რატომ იყიდეს სწრაფი ტემპით ხელისუფლების კარის ბიზნესმენებმა დაცარიელებული ბაზრები?

ანი დვალიშვილი

საქართველოს ეროვნულმა ბანკმა ოფიციალურად დაადასტურა, რომ კომერციულმა ბანკებმა მიმდინარე წლის, გასული ათი თვის განმავლობაში, ლამის ორ მილიარდამდე სარგებელი ნახეს. საუბარი სუფთა მოგებაზეა და ხომ დარწმუნებული ხართ, რომ ეს მოგება ჩემი და თქვენი ჯიბიდან ამოიღეს არარეალური პროცენტების გადახდის გამო. აბა, როგორ არ გავიხსენოთ, „ოცნების“და პირადად ბიძინა ივანიშვილის წინასაარჩევნო დაპირება, ბანკის პროცენტი ძალიან დაბალი იქნება და მოსახლეობის უმრავლესობა, ბიზნესის წამოსაწყებად უფასო, უპროცენტო ფულს მიიღებსო. ბანკები გვთავაზობენ სესხს ეფექტურ 17 ან 19%-ში და რეალურად, ხელშეკრულების მოწერის წინ ირკვევა, რომ ეფექტური 47%-დან 51%-მდეა დამტკიცებული. არადა, ეს იყო „ოცნების“ ერთ-ერთი უმთავრესი დაპირება და მას შემდეგ მდგომარეობა უფრო გაუარესდა და ხელისუფლება ჯერჯერობით, არაფრის შეცვლას არ აპირებს, აქაოდა, კერძო ბიზნესია და ვერ ვერევითო. არადა, როცა მოუნდათ, მედიკამენტების ფასებში ძალიან კარგად ჩაერივნენ. სწორედ ეს არის უსამართლობა და ორმაგი სტანდარტი, ბატონებო…

თბილისში გარე-ვაჭრობა ჯარიმითა და საქონლის კონფისკაციით რეგულირდება. ჰოდა, უკვე მიღებული გადაწყვეტილების თანახმად, დედაქალაქის პრაქტიკა უკლებლივ ყველა მუნიციპალიტეტში გავრცელდება და 2023 წლის პირველი იანვრიდან, გარე-ვაჭრობა ქვეყნის მასშტაბით აიკრძალება და დასჯადი გახდება… საქონლის კონფისკაციით. მეტიც, მუნიციპალიტეტებს უკვე უთხრეს, როგორი სპეც-ტანსაცმელი უნდა შეიძინონ იმ ადამიანებისთვის, რომლებიც ამ ყველაფერს გააკონტროლებენ და ეს სპეც-ტანსაცმელი ყველასთვის თვალში საცემი იქნება და მათი გამოჩენა კი იმის ნიშანი, რომ გარე-მოვაჭრეებს დააწიოკებენ. ჯარიმებიდან მიღებული თანხები მუნიციპალიტეტებში დარჩება და ადგილობრივ ბიუჯეტს შეავსებს. ჰო, „ოცნების“ ლოგიკით, გარე-ვაჭრობის უმკაცრესი აკრძალვა იმასაც მოიტანს, რომ ნახევრად ცარიელი ბაზრები შეივსება და მოვაჭრეთა დიდი ნაწილი სწორედ იქ შევა. სწორედ ამიტომაცაა, დაცარიელებული ბაზრებით დაინტერესება ხელისუფლების კარის ბიზნესმენებმა რომ გამოთქვეს და ათეულობით მუნიციპალიტეტში, უქმად მდგარი ბაზრები ჩალის ფასად იყიდეს. სამწუხაროდ, მათგან განსხვავებით, მისმა მფლობელებმა მაშინ არ იცოდნენ, რომ ახალი წლიდან ეს ბაზრები აუცილებლად ამუშავდება.