რას ამბობს კალაძე ყაზბეგის ქუჩის მშენებლობაზე, სადაც მოსახლეობის პროტესტია

ყაზბეგის გამზირის N32-ის მცხოვრებლები კორპუსის წინ მიმდინარე მშენებლობას აპროტესტებენ. ადგილზე დილიდან დაპირისპირებაა.

ვითარება რამდენჯერმე დაიძაბა სამშენებლო კომპანია sky residence-ის მიერ ტერიტორიაზე მძიმე ტექნიკის შეყვანის გამო.

ადგილობრივები ამბობენ, რომ კომპანია მრავალსართულიან კორპუსს უსაფრთხოების შესახებ შესაბამისი დოკუმენტის გარეშე აშენებს. ისინი უსაფრთხოების სრულ გარანტიებამდე მშენებლობის შეჩერებას ითხოვენ. მოსახლეობა მედიასთან ჰყვება, რომ სამუშაოების დაწყებას მათ კორპუსშიმოჰყვა რყევები, დაიბზარა ასფალტი.

“გაგვიჩნდა ბზარები, გაიჭედა კარი. მე პირადად ვერ შევედი სახლში, სანამ არ გამოვიძახე კარი და არ გაასწორეს კარი. ეს ყველაფერი დაფიქსირებული აქვს კომპანიას. ჩვენი ექსპერტებიც მუშაობენ ამ საკითხზე. ორი დასკვნა გვაქვს. გამოგვაცალეს ძირი, ამას ლობირებს მერია, საკრებულო, ტყემალაძე, კალაძე. საბუთებს არ გვატანენ გამგეობიდან, რომ კანონიერად არ შევიტანოთ სასამართლოში”- ამბობს ადგილობრივი.

2022 წელს ადგილზე მშენებლობის უფლება მოიპოვა ოლიგარქი ბიძინა ივანიშვილის ძმამ, ალექსანდრე ივანიშვილმა, თუმცა ის მალევე გაასხვისა. ახლა მშენებლობას სამუშაოებს ატარებს კომპანია sky residence, რომელიც ადგილზე 10-სართულიანი კორპუსის აშენებას გეგმავს.

თბილისის მერი კი აცხადებს:

,,სრული პასუხისმგებლობით გეუბნებით, რომ მშენებლობა მიმდინარეობს კანონიერად. მე ვიცნობ აღნიშნულ პრობლემას. რაც შეეხება იმ კორპუსის ავარიულობას, არაერთხელ დავაფიქსირეთ და კიდევ ერთხელ გამოვხატავთ მზაობას, რომ დავეხმაროთ ამ ადამიანებს, ხელი შევუწყოთ კორპუსის გამაგრებაში. თუ ეს წინადადება მათთვის მიუღებელია, შეგვიძლია მეორე პროექტი განვახორციელოთ – ეს არის კორპუსის ჩანაცვლება, ძველის დემონტაჟი და ახლის მშენებლობა”, – თქვა კალაძემ.