Bm.ge დაინტერესდა, რა ქონებით მიდის „ოცნების“ ერთ-ერთი ყველაზე ხანგრძლივი მინისტრი თანამდებობიდან. როგორც ჩანს, ვახტანგ გომელაურს ქონებრივი დეკლარაცია ბოლოს 2024 წლის 24 ივნისს აქვს შევსებული.
დეკლარაციაში მითითებული ქონების მიხედვით, მას თბილისში, ილია ჭავჭავაძის გამზირზე 200,7 კვ.მ ფართობის ბინა 2022 წელს, 542 000 ლარად აქვს ნაყიდი. მის მეუღლეს, ნინო კუდუხაშვილს კი ტაბახმელაში, 2001 კვ.მ საცხოვრებელი სახლი 123 717 ლარად აქვს ნაყიდი. ჩუქებით კი მიღებული აქვს მიწის ნაკვეთი თიანეთის რაიონის სოფელ გორანაში (1422 კვ.მ) და აგარაკი ამავე სოფელში (1088 კვ.მ).
საბანკო ანგარიშებთან დაკავშირებით ვახტანგ გომელაურს დეკლარაციაში მითითებული აქვს სესხის ანგარიში 188 ათასი ლარის ოდენობით, ასევე სახელფასო და მიმდინარე ანგარიშები, რომლებზეც 50 ათას ლარამდე თანხა აქვს განთავსებული. დეკლარაციის თანახმად, ვახტანგ გომელაური სახლში ნაღდი ფულის სახით ინახავს 7,400 დოლარს და 18 000 ლარს.
2023 წელს მას მინისტრის პოსტზე აღებული აქვს 96 788,76 ლარის ოდენობის ხელფასი.
ვახტანგ გომელაური შს მინისტრის პოსტს 2019 წლის 8 სექტემბრიდან იკავებდა. ის მაშინ ამ პოზიციაზე მეორედ დაინიშნა. მანამდეც, 2015 წელს დაახლოებით რვა თვის განმავლობაშიც იყო შს მინისტრი. შემდეგ 2015 წლის 1 აგვისტოს სუს-ის უფროსად დაინიშნა. 2015 წლამდეც იყო შინაგან საქმეთა სამინისტროში, კერძოდ, 2013-2015 წლებში იკავებდა ჯერ მინისტრის მოადგილის, შემდეგ კი პირველი მოადგილის პოზიციას. 2003-2013 წლებში კი მუშაობდა საქართველოს შინაგან საქმეთა სამინისტროს – სსიპ დაცვის პოლიციის დეპარტამენტში. დამთავრებული აქვს სახელმწიფო ფიზიკური აღზრდისა და სპორტის აკადემია.
კომენტარები