განათლებისა და კულტურის საპარლამენტო კომიტეტის თავმჯდომარემ, თეა წულუკიანმა შს მინისტრის, ვახტანგ გომელაურის „მინისტრის საათის“ ფორმატში პარლამენტში გამოსვლის შემდეგ სიტყვა ითხოვა და თქვა, რომ გომელაური გარდა, ყველასთან აქვს კითხვა:
„კითხვა არ მაქვს, უბრალოდ, კარგი იქნებოდა, იდეას შემოგთავაზებდით, თუ ამას გაიზიარებდით, რომ განათლების სამინისტროსთან, სოციალურ სააგენტოსთან ცოტა უფრო მჭიდროდ ვიმუშაოთ ყველამ ერთად, რომ მუდმივად საზოგადოებას არ ეგონოს, რომ ნებისმიერი შემთხვევა არის შინაგან საქმეთა სამინისტროს თემა და ბრალი. ჩვენ მოვახდინეთ სტამბოლის კონვენციის რატიფიცირება, ძალიან ამაყი ვარ, რომ ამ ძალიან დიდ დოკუმენტზე ხელმოწერის პატივი მე მხვდა წილად 2014 წელს სწორედ ღარიბაშვილის პრემიერობის დროს.
არ გაგვიკეთებია „ქართულ ოცნებას“ ამ დიდი დოკუმენტის რატიფიცირება იმისთვის, რომ ოჯახში ძალადობა ისევ ყველას ეგონოს, რომ მხოლოდ პოლიციიის ბრალი და თემაა. სტამბოლის კონვენციის რატიფიცირება სწორედ იმიტომ გავაკეთეთ, რომ ეს თემები გამხდარიყო უწყებათაშორისი თემები, როდესაც მასწავლებელს კლასში დადის, ის ქობულეთელი გოგო, რომელიც სკოლაში დადიოდა, მე მაინტერესებს და აქ რომ გვეყოლება მინისტრი, დავუსვამ კითხვას, რა გააკეთა მასწავლებელმა, ჩვენ პირდაპირ ჩავუწერეთ სტამბოლის კონვენციის რატიფიცირებისას კანონში მასწავლებელს და დირექტორს ვალდებულება, რომ ეს გამოავლინოს.
რას აკეთებდა სოცმუშაკი, ამისთვის გავაკეთეთ ჩვენ სტამბოლში კონვენციის რატიფიცირება. თქვენ გაქვთ თქვენი კომპეტენციები, მე ამას არ უარვყოფ და პასუხიც გექნებათ, მაგრამ მუდმივად იმის ძახილი, რა გააკეთეთო, ეს არ არის მხოლოდ ერთი სამინისტროს თემა, ამას ემსახურება სტამბოლის კონვენცია, ამიტომ თქვენ ალბათ კარგი იქნებოდა, თუ მაქვს ამისი უფლება, რომ შემოგთავაზოთ, ამ უწყებებთან უფრო რაღაცნაირად თქვენ აიღოთ ინიციატივა, რომ ყველამ თავისი საქმე სათანადოდ შეასრულოს.
მერი, სად იყო მერი, სად იყო მერის წარმომადგენელი იმ კონკრეტულ სოფელში თუ უბანში, არ იცოდა, ოჯახში რა ცოდვის განკითხვა ტრიალებდა? ეს არ არის ერთი ადამიანის და ერთი უწყების თემა, ეს არის უწყებათაშორისი საკითხი და იქნებ, თქვენ აღიმაღლოთ ამ მიზნით ხმა, რაშიც ჩვენც დაგეხმარებით“
ქალბატონ თეა წულუკიანს, იმედია, წაკითხული აქვს ხორავას საქმე – უნდა იცოდეს იმ დარღვევებზე, რა დარღვევებზეც საგამოძიებო კომიასიამ იმუშავა – რა გააკეთა შსს-მ? დაიწყო ძიება? განათლების სამინისტრომ? რამე შეცვალა? ახლა კითხულობთ, ქალბატონო თეა? კარგია, ახლა მაინც რომ გაგახსენდათ! თუმცა, ამ კონკრეტულ შემთხვევაში ის 14 წლის გოგონა, რომელიც გარდაცვლილია, არაერთხელ მივიდა პოლიციაში – შესაბამისად, კითხვები დიახაც უნდა გქონდეთ გომელაურთანაც… იქნებ, გომელაური თქვენი უფრო ახლო მეგობარია, ვიდრე ჩხენკელი, ან ქობულეთის მერი, ან ტიკარაძე, მაგრამ გომელაურის უწყებას თავისი წილი პასუხისმგებლობა აქვს და მას ვერ გაექცევა, ადრე თუ გვიან.
იქნებ, არც ის იცით, სოცმუშაკები შეამცირა თქვენმა მთავრობამ და ფიზიკურად არ გვყავს? იქნებ, არც ის იცით, რომ მთელ ქობულეთში მხოლოდ ერთი სოცმუშაკია?
რაც შეეხება ღიაობის საკითხს, ქალბატონო თეა, თქვენი მინისტრობის დროს თქვენი სამინისტროს პიარი რიგ მედიებს გაებუტა, მათ შორის “ალიას” და არაერთხელ მოგმართეთ! ასე რომ ღიაობაზეც საუბარიც დაგვიანებულია, მაგრამ ახლა მაინც თუ მიხვდით, რა უჭირს. უწყებათაშორისი კომუნიკაცია კი არა, ათობით სსიპ-ები რომ შექმენით, იცით, რომ სამინისტრო არ გპასუხობს და არ იცის, რას აკეთებს მისი სსიპ-ი? იცით, რომ საკუთარ სსიპ-თანაც არ აქვს კომუნიკაცია?
უწყებათაშორისი კომუნიკაცია ისე მთავრობის მეთაურის საქმე უნდა იყოს, მაგრამ ეგაც თქვენი მეგობარია, ხომ ქალბატონო თეა, ამიტომ იმას დავავალოთ, ვისაც არ ევალება, ასე საქმეს არ ეშველება, მაგრამ ნაწყენი არავინ დაგრჩებათ!
ეს კითხვები, რაც დასვით, ალბათ, ჩვენს მოსასმენადაა, ქალბატონო თეა, თორემ, რომელი მინისტრი გემდურით? რომელს ვერ დაუკავშირდით? რომელი მინისტრი არ მოდის პარლამენტში? ახლა აქ არ არის, თორემ, ვკითხავდიო, პარასკევია დღესაო?
კომენტარები