ქვემო ფონიჭალაში მომხდარი ტრაგედიის ადგილზე მოქალაქეთა ნაკადი არ წყდება. ადამიანები აფეთქების შედეგად დაღუპულ ექვს ადამიანს გლოვობენ და მათი ხსოვნის პატივსაცემად სპეციალურად მოწყობილ კუთხეში ყვავილები და სანთლები მიაქვთ.
აფეთქების შედეგად დაზიანებული საცხოვრებელი კორპუსი თუნუქის ღობით შემოსაზღვრეს. შემთხვევის ადგილზე უსაფრთხოების ზომები კვლავ გამკაცრებულია.
არსებული ინფორმაციით, შენობის დემონტაჟი, სავარაუდოდ, მას შემდეგ დაიწყება, რაც გადარჩენილი ბინებიდან მოქალაქეები პირადი ნივთების გამოტანას დაასრულებენ.
მას შემდეგ, რაც გავრცელდა ინფორმაცია, რომ ამორტიზირებულ კორპუსში 28 ოჯახის დაბრუნება ვეღარ მოხდება, ადამიანებმა, რომლებიც მომიჯნავე კორპუსებში ცხოვრობენ, განგაშის სიგნალი ჩართეს. მომიჯნავე კორპუსების მცხოვრებლები ამბობენ, რომ მათი საცხოვრებელი შენობებიც ავარიულ მდგომარეობაშია და შესაძლო დემონტაჟმა შესაძლოა საფრთხე კიდევ უფრო გაზარდოს. ადგილობრივები ხელისუფლებას დროული რეაგირებისკენ მოუწოდებენ და აცხადებენ, რომ მორიგი ტრაგედიის თავიდან ასაცილებლად უსაფრთხოების ზომების მიღება აუცილებელია.
დასაშლელია საერთოდ კორპუსი, იმიტომ, რომ როგორც ასეთი, აქვს ბეტონის კოროზია კორპუსს მთლიანად. დასუსტებულია, ფაქტობრივად, მარტო მეტალი იჭერს მთელ კორპუსს, იშლება, იფშვნება კორპუსი. აქ მანქანები რომ დადიან, ვიბრაციაა და იშლება და იშლება ბეტონი. კიდევ მაინც და მაინც მსხვერპლს უნდა ველოდოთ, რომ რაღაც მოხდეს? ხომ შეიძლება, წინასწარ რაღაც გაკეთდეს და მოგვხედონ, – ამბობს ადგილობრივი.
ქვემო ფონიჭალაში, კორპუსში მომხდარი აფეთქებას 6 ადამიანის სიცოცხლე ემსხვერპლა. ნანგრევებში მოყოლილი 7 ადამიანიდან მხოლოდ 3 წლის თაია გადარჩა. დაღუპულთაგან 3 ქალია, 1 კაცი და 2 ბავშვი.
დაღუპულთა ხსოვნის პატივსაცემად, 2026 წლის 22 ნოემბერი საქართველოში გლოვის დღედ გამოცხადდა.











კომენტარები