თბილისის საქალაქო სასამართლოში, სადაც 4 ოქტომბრის აქციის საქმეზე დაკავებულთა პროცესი მიმდინარეობს, საკუთარი პოზიციები დააფიქსირეს ბრალდებულებმა.
განსასჯელის სკამზე პაატა ბურჭულაძე, მურთაზ ზოდელავა, ირაკლი ნადირაძე, პაატა მანჯგალაძე, ლაშა ბერიძე, ირაკლი ჩხვირკია, გური ჟვანია, ნიკა გვენცაძე და თორნიკე მჭედლიშვილი სხედან, გდდ-ს ყოფილი მაღალჩინოსანი, ირაკლი შაიშმელაშვილი კი საქართველოში არ იმყოფება. სხდომას მისი ადვოკატი ესწრება…
სხდომიდან რეპორტაჟს აქვეყნებს ლაშა ფარულავა:
,,გამოცხადდა შესვენება და ქრონოლოგიურად მოგიყვებით სხდომის ამბებს.
12:50 საათზე პატიმრები დარბაზში შემოიყვანეს.
ყველა იღიმოდა, ყველას უხაროდა ჩვენი დანახვა.
ნადირა გაღიმებისკენ მოგვიწოდებდა.
პაატა ბურჭულაძე განსაკუთრებით გახარებული ჩანდა.
დარბაზი ხალხით იყო სავსე, ერთმანეთს თბილად ესალმებოდნენ.
პაატა მანჯგალაძე ცოტათი სევდიანი მეჩვენა.
ლაშა ბერიძე მტკიცედ იდგა, როგორც ნამდვილი სამხედრო.
მურთაზ ზოდელავა კუთხეში დაჯდა და ჩემი ადგილიდან კარგად ვერ დავინახე.
ჩხირკო კი, როგორც ყოველთვის, გულით იღიმოდა და გვამხნევებდა.
ე.წ. მოსამართლე ირაკლი შვანგირაძე გვიცხადებს, რომ თუ ჟურნალისტები დატოვებენ დარბაზს, უკან ვეღარ დაბრუნდებიან.
ამას ნანუკა ქაჯაია ხმამაღლა აპროტესტებს, საუბრობს ჟურნალისტური საქმიანობის შეზღუდვაზე.
მოკლედ 13:00 საათზე, ერთი საათის დაგვიანებით, სასამართლო სხდომა გაიხსნა.
დაიწყო ბრალდებულების რუტინული გამოკითხვა, სად დაიბადნენ და სხვა ფორმალური კითხვები.
ირაკლი ჩხიკვია ღიმილით პასუხობს: „დავიბადე დასაწვავ მოსკოვში, რეგისტრირებული ვარ აფხაზეთში, გაგრაში, დაკავებამდე კი თბილისში, აეროპორტის დასახლებაში ვცხოვრობდი.“
დარბაზი შიგადაშიგ ტაშით პასუხობს.
მოსამართლე ბრაზდება. პროკურორები კი ჩუმად სხედან, ცივი სახით და მშიერი თვალებით გვიყურებენ.
ბრალს არცერთი დაკავებული არ აღიარებს, ყველა თავს უდანაშაულოდ აცხადებს.
ბრალდებულთა ნაწილს პირადად არც კი ვიცნობ და რამდენიმე პირველად ვნახე, მაგრამ ერთი რამ აშკარაა: ყველა მათგანი სამშობლოზე უზომოდ შეყვარებული ადამიანი და ნამდვილი პატრიოტია.
მათი თითოეული სიტყვა ამაში კიდევ ერთხელ მაჯერებს.
თავისუფლება რეჟიმის ტყვეებს.
ბოლოს მაინც ჩვენ გავიმარჯვებთ”.
კომენტარები