რიყის პარკის მიმდებარედ მომხდარ უბედურ შემთხვევას თბილისის 132-ე საჯარო სკოლის მე-10 კლასის მოსწავლე იოსებ ადეიშვილის სიცოცხლე შეეწირა.
უბედური შემთხვევა 25 იანვარს მოხდა. მისი გადარჩენა მასთან ერთად მყოფმა ბავშვებმა სცადეს, მაგრამ უშედეგოდ. სულისშემძვრელია სკოლის დირექტორის მონათხრობი.
თამარ მაჭარაშვილი, 132-ე საჯარო სკოლის დირექტორი:
– იოსები ჩვენი სკოლის მოსწავლეა, ძალიან განვიცდით ამ უმძიმეს ამბავს. დიდი უბედურება დატრიალდა, ოჯახი ძალიან დიდ მწუხარებაშია და შეხვედრაც ვერ მოვახერხეთ ჯერჯერობით. დღეს მივდივართ სამძიმარზე. ქირით ცხოვრობდნენ და როგორც შევიტყვეთ, ვის ბინაშიც ცხოვრობდნენ, იმ ბინის პატრონმა ცხედრის დასვენების უფლება არ მისცა ოჯახს და ამიტომ ბავშვი ცხედარი დასვენებულია გურამიშვილის გამზირზე რიტუალებისთვის განკუთვნილ დარბაზში.
დღეს ვაპირებთ სამძიმარზე მისვლას. ძალიან მძიმე ამბავი მოხდა, იოსები არ იყო მერვე კლასელი, როგორც ვრცელდება, ის ჩვენი სკოლის მეათე კლასის მოსწავლე იყო. იმ საბედისწერო დღეს მასთან ერთად იყო ჩვენი სკოლის კიდევ ორი მოსწავლე, ისინი მერვე კლასელები არიან. ბავშვები მუსიკაზე ერთად დადიოდნენ. მოილაპარაკეს, კარგი ამინდი იყო და როგორც გავიგე, შაბათს რიყეზე სასეირნოდ წავიდნენ. ის ორი ბავშვი უფრო ადრე მისულა, მერე შეუერთდა მათ იოსებიც. იმხელა სტრესში არიან ბავშვები, ისე განიცდიან, რომ ფსიქოლოგებმა სასტიკად აგვიკრძალეს მათთან გასაუბრებაც კი.
განსაკუთრებით მძიმეა იმ ბავშვის ფსიქოემოციური მდგომარეობა, რომელიც თავად ცდილობდა მის ამოყვანას. ვერ შეძლო და თავს იდანაშაულებს. საშინელი ფსიქოლოგიური სტრესის ქვეშ არიან. მანდატურებმაც გვთხოვეს და მშობლებთან ერთად მოვიყვანეთ გუშინ სკოლაში, სოცმუშაკიც იყო, ფსიქოლოგიც და ძალიან მძიმეა მათთვის ამ ფაქტის გახსენება.
რასაც “ტვ პირველი” ამბობს, ასე არ არის. რიყის დოქები რომ დგას, იმის ქვეშ ყოფილა შესაძრომი და როგორც ბავშვები ამბობენ, იოსები იქ შეძვრა.
ხომ იცით, როგორი ცნობისმოყვარეები არიან ბავშვები. ძალიან ცნობისმოყვარე იყო იოსებიც, კეთილი და პატიოსანი ბავშვი. ბავშვების თქმით, იოსები იქ შევიდა იმიტომ, რომ საპირფარეშო მოუნდა. ეს სამი ბავშვი ჩვენი სკოლის რუსულენოვან სექტორში სწავლობდა. იოსების დედა ეროვნებით რუსია, მამა ქართველი ჰყავს. აბა, რას მოიფიქრებდა ადამიანი, რომ პარკის გვერდით ამხელა საფრთხე ელოდა.
ბავშვები იქვე ახლოს იყვნენ და იოსების ყვირილის ხმაზე შევიდნენ იქ და ნახეს, რომ ბავშვი უკვე ჩავარდნილი იყო. მომხდარით შოკირებულები გამვლელებს დახმარებას სთხოვდნენ, მაგრამ გამვლელებმა საერთოდ არ მიაქციეს მათ ყურადღება, არადა, ბავშვები შველას ითხოვდნენ, ნახევარი საათი არავინ გაეკარა თურმე, არადა, თურმე ხალხით სავსე იყო იქაურობა.
მხოლოდ ერთი ადამიანი შეეცადა დახმარებას. რატომაც ამაზე არ საუბრობს ახლა არავინ, რომ ეს იყო გულგრილობა გამვლელების მხრიდან, არავის დაურეკავს 112 – ში…
სტრესში მყოფმა ბავშვებმა ვერ მოიფიქრეს, რომ თვითონ დაერეკათ.
ვინც იძიებს საქმეს, იმათ ბავშვებისთვის უთქვამთ, ჩვენ კამერებს ამოვიღებთ და გულგრილობისთვის პასუხს მოვთხოვთ ამ ხალხსო.
თბილისში დაბადებული და გაზრდილია ეს ბავშვი. გლდანში, მერვე მიკრორაიონში ცხოვრობს ოჯახი, ნაქირავებ ბინაში. ძალიან მძიმეა ამაზე საუბარი ჩემთვის. როგორც გვითხრეს მუსიკაზე დადიოდა, რა ინსტრუმენტზე, ამაზე არ მაქვს ინფორმაცია.
იოსები ძალიან თბილი და ყურადღებიანი ბავშვი იყო, მოწესრიგებული. პირველი კლასიდან მე ვასწავლიდი ქართულს, უფროსის მიმართ პატივისცემით გამოირჩეოდა. ყველა ბავშვი ჩემთვის ძალიან ძვირფასია და განვიცდი, მიჭირს საუბარიც კი. რომ მივიდნენ ყვირილზე ბავშვები უკვე ჩავარდნილი იყო, სიღრმე რა იყო, არ ვიცი. მინდოდა ის ადგილი მენახა, განა რა არის იმისთანა. იქნებ შეიძლებოდა გადარჩენა.
როგორც ცნობილია, შინაგან საქმეთა სამინისტრომ რიყის პარკში, მოზარდის დაღუპვასთან დაკავშირებით გამოძიება უკვე დაიწყო. როგორც უწყებაში ამბობენ, მომხდარზე გამოძიება სისხლის სამართლის კოდექსის 115-ე მუხლით დაიწყო, რაც თვითმკვლელობამდე მიყვანას გულისხმობს. რას დაადგენენ სამართალდამცავები ეს მოგვიანებით გახდება ცნობილი.
კომენტარები