ყირგიზეთის პრეზიდენტი სოორონბაი ჟეენბეკოვი გადადგა. ამის შესახებ BBC წერს. მანამდე ცნობილი გახდა, რომ მის რეზიდენციასთან ძალოვანთა გაძლიერებულმა რაზმებმა დაიწყეს მორიგეობა.
„ძვირფასო თანამემამულენო. ჩემთვის ყირგიზეთის მშვიდობა, ქვეყნის ერთობა, ჩვენი ხალხის ერთიანობა და საზოგადოების სიმშვიდე ყველაზე მნიშვნელოვანია. ჩემთვის არაფერია თითოეული თანამემამულის სიცოცხლეზე ძვირფასი. ძალაუფლებას არ ვეჭიდები. არ მინდა ყირგიზეთის ისტორიაში დავრჩე როგორც პრეზიდენტი, რომელმაც სისხლი დაღვარა და საკუთარ მოქალაქეებს ესროლა. ამიტომ, გადავწყვიტე, გადავდგე“, – ნათქვამია ჟეენბეკოვის განცხადებაში.
გუშინ ცნობილი გახდა, რომ ჟეენბეკოვს გადადგომა ყირგიზეთის ახალმა პრემიერ-მინისტრმა, სადირ ჟაპაროვმა მოსთხოვა, თუმცა პრეზიდენტისგან უარი მიიღო.
ყირგიზეთში საპროტესტო გამოსვლები საპარლამენტო არჩევნების შედეგების წინააღმდეგ 5 ოქტომბერს დაიწყო. დემონსტრანტები პარლამენტის შენობაში შეიჭრნენ, შემდეგ კი პატიმრობიდან ყოფილი პრეზიდენტი ალმაზბეკ ატამბაევი გაათავისუფლეს.
მოგვიანებით, ყირგიზეთის ცენტრალურმა საარჩევნო კომისიამ არჩევნების შედეგები ბათილად გამოაცხადა, პრემიერ-მინისტრმა კი, თანამდებობა დატოვა. პარლამენტმა პრემიერ-მინისტრის მოვალეობის შემსრულებლად სადირ ჟაპაროვი დაამტკიცა, რომელიც მომიტინგეებმა არეულობის დროს გაათავისუფლეს.
9 ოქტომბერს ქვეყნის პრეზიდენტმა სოორონბაი ჟეენბეკოვმა ბიშკეკში საგანგებო მდგომარეობა გამოაცხადა.
პირველი კენჭისყრის შედეგები მოქმედმა პრეზიდენტმა არ ცნო, თუმცა მეორე კენჭისყრის შემდეგ იძულებული გახდა, ჟაპაროვის კანდიდატურა დაემტკიცებინა.
კომენტარები