ყაზახეთში ყველა ბანკი დაიხურა

ყაზახეთში მუშაობა დროებით ყველა ბანკმა შეწყვიტა. Report.ge-ს ცნობით, ინფორმაციას ყაზახეთის ეროვნული ბანკი ავრცელებს.

მათივე ცნობით, აღნიშნული ღონისძიება კონტრტერორისტული ოპერაციების ჩატარების, ინტერნეტის გაუმართაობისა და თანამშრომლებისა და მომხმარებლების დასაცავად გატარდა.

ფინანსური და საკრედიტო ორგანიზაციების მუშაობის დროებით შეჩერების შესახებ გადაწყვეტილება ფინანსური ბაზრის რეგულირებისა და განვითარების სააგენტომ და ყაზახეთის ეროვნულმა ბანკმა ერთობლივად მიიღეს. 

ცნობისთვის, ყაზახეთში მთავრობა გადადგა – პრეზიდენტმა ყასიმ-ჟომართ თოყაევმა ქვეყანაში საწვავის ფასის ზრდის გამო დაწყებული საპროტესტო აქციების შემდეგ, მთავრობის გადადგომის შესახებ გადაწყვეტილებას ხელი მოაწერა. 

ბოლო სამი დღის განმავლობაში, ყაზახეთის მანგისტაუს რეგიონში საპროტესტო აქციები მიმდინარეობდა. დემონსტრანტები თხევადი ბუნებრივი აირის ფასების მკვეთრ ზრდას აპროტესტებდნენ. პროტესტმა განსაკუთრებულად მწვავე სახე მიიღო ქალაქ ალმატიში. 4 იანვრის საღამოს, ქალაქის ცენტრში შეკრებილი დემონსტრანტები ძალის გამოყენებით გაიყვანეს, გამოყენებული იყო ცრემლსადენი აირი, კვამლის ყუმბარები და რეზინის ტყვიები. დააკავეს ათობით პირი.