ყაჩაღობის ახალი სცენარი ზუგდიდში – როგორ გაითამაშა კაცმა მეგობარი ქალის დაყაჩაღება

ყაჩაღობა სამეგრელოში – პოლიციამ დააკავა მამაკაცი, რომელსაც ავტომობილში მეგობარ ქალთან ერთად თავს დაესხნენ. ქალს სამკაულები გასტაცეს. აღმოჩნდა, რომ დაგეგმილი სცენარის ავტორი სწორედ ქალის მეგობარი მამაკაცი იყო.

მომხდართან დაკავშირებით შსს სპეციალურ განცხადებასაც ავრცელებს:

“ბრალდებულის სახით დაკავებულია 1983 წელს დაბადებული ე.გ.

გამოძიებით დადგინდა, რომ ბრალდებული თავის ნაცნობ, 1994 წელს დაბადებულ ქალთან ერთად ავტომობილში იმყოფებოდა, რა დროსაც მათ ყაჩაღურად თავს დაესხნენ და ქალს ძალადობის მუქარით ოქროს სამკაულები გასტაცეს. ჩატარებული საგამოძიებო ღონისძიებებით დგინდება, რომ ყაჩაღური თავდასხმა ბრალდებულმა დაგეგმა და თანამზრახველებთან ერთად, წინასწარ შეთანხმებული გეგმის მიხედვით განახორციელა.

პოლიციამ ე.გ. მომხდარიდან მალევე, ზუგდიდის მუნიციპალიტეტში დააკავა.

დანაშაულში მონაწილე სხვა პირთა დადგენა-დაკავების მიზნით გრძელდება საგამოძიებო და ოპერატიული ღონისძიებები.

ჯგუფურად ჩადენილ ყაჩაღობის ფაქტზე გამოძიება საქართველოს სისხლის სამართლის კოდექსის 179-ე მუხლის მე-2 ნაწილის “ბ” ქვეპუნქტით მიმდინარეობს” – ნათქვამია განცხადებაში.

დანაშაული 6-დან 9 წლამდე ვადით თავისუფლების აღკვეთას ითვალისწინებს.