,, ქალბატონი ხოშტარია მობრძანდა მერე აეროპორტში თავის ორ თანმხლებ პირთან ერთად და ატეხეს ერთი ამბავი” – ვახტანგ გომელაური

“გუშინ ცხრა რუსეთის მოქალაქე არ შემოვუშვით. ქალბატონი ხოშტარია მობრძანდა მერე აეროპორტში თავის ორ თანმხლებ პირთან ერთად და ატეხეს ერთი ამბავი, რატომ არ შემოუშვითო – იმ დანარჩენ რვა ადამიანზე რატომ არ იკითხეს არაფერი?”, – ასე უპასუხა შინაგან საქმეთა მინისტრმა ვახტანგ გომელაურმა პარლამენტში დასმულ შეკითხვას, 20 თებერვალს, საქართველოში პუტინის კრიტიკოსი ჟურნალისტის, ფილიპ ძიადკოსარ შემოშვების შესახებ.

გომელაურის სიტყვებით, მას არ უნახავს არცერთი ოპოზიციონერის განცხადება საქართველოს იმ მოქალაქეების შესახებ, რომლებიც უცხო ქვეყნების საზღვრებზე არ უშვებენ.

“მე გული მწყდება ხოლმე, როცა ჩვენი ქართველები ზიან, ქვეყანას არ დავასახელებ, ამა თუ იმ საზღვართან რომლებსაც არ უშვებენ. მე არასდროს არ მინახია ოპოზიციიდან გამოსული ვინმე, რომ ეთქვას, ნეტავ რა ხდება – ან მიემართოს ელჩისთვის… მე არ ვიცი ასეთი მიდგომა არასწორია ჩემის აზრით, ჯერ ჩვენს მოქალაქეებს მივხედოთ, რომლებიც დაწყებული მექსიკის საზღვრიდან, სხვა ბევრ ქვეყანაში ჩადიან, რომლებსაც არ უშვებენ საზღვარზე”, – ამბობს შს მინისტრი.

ამავე გამოსვლაში გომელაურმა საქართველოში რუსეთის მოქალაქეების მასიურ შემოსვლაზეც ისაუბრა და განაცხადა, რომ ამ მხრივ რაიმე კატასტროფული მატება არ შეინიშნება.

“წლევანდელ წელს, 2023 წელს რუსეთის მოქალაქე შემოვიდა 136 ათას 979, თითქმის 137 000 და გასულია რუსეთის მოქალაქე – 150 913, ანუ 13 934 ადამიანით მეტი გავიდა 2023 წლის 1-ლი იანვრიდან, რაც შემოვიდა რუსეთიდან. ის, რომ კატასტროფულად გაიზარდა და რაღაცა უბედურება ხდება, ნამდვილად არ ხდება”, – ამბობს გომელაური. 

,,მთავარი არხი”