გუდაურში მომხდარი მკვლელობის საქმე – დღეს გაირკვა, რომ საქმის ფიგურანტებს, ბრალი წარუდგინეს. 6 ადამიანს მკვლელობაში ბრალდებულის, მერაბ კობიაშვილის მიმართ ჯგუფურად განხორციელებულ ძალადობას ედავებიან, თუმცა ისინი დაკავებულები არ არიან.
მათი საქმე ცალკე წარმოებადაა გამოყოფილი. დაპირისპირების ერთ-ერთი ფიგურანტი, მიშო უნდილაშვილია.
მერაბ კობიაშვილის ადვოკატი აღნიშნავს, რომ თავდაპირველ ჩვენებაში უნდილაშვილი აცხადებდა, რომ კობიაშვილმა ის მკვლელობამდე ორი კვირით ადრე სცემა, ახალ ჩვენებაში კი ის ამბობს, რომ კობიაშვილი მას, სწორედ 16 თებერვალს, მკვლელობამდე რამდენიმე საათით ადრე გაუსწორდა.
კობიაშვილის ადვოკატი ტარიელ კაკაბაძე, პროკურატურის გადაწყვეტილებას აღიარებას უწოდებს. მისი თქმით, სავარაუდოდ, საზოგადოებრივმა ზეწოლამ შედეგი გამოიღო და პროკურატურა იძულებული გახდა, მერაბ კობიაშვილზე თავდასხმაში მონაწილე პირები პასუხისგებაში მიეცა.
“მიუხედავად იმისა, რომ პროკურატურას პირველივე დღიდანვე ჰქონდა ძალიან ბევრი ჩანაწერი და ეს პირებიც იდენტიფიცრებულები იყვენ, მათთვის ბრალის წარდგენა, მხოლოდ სამი თვის შემდეგ გადაწყვიტეს. დღევანდელი გადაწყვეტილება იყო აღიარება იმისა, რომ მერაბ კობიაშვილი თავდასხმის დროს, თავდაცვის მდგომარეობაში იყო’ – აღნიშნავს დაკავებულის ადვოკატი.
შეგახსენებთ, ინციდენტი გუდაურში 16 თებერვალს მოხდა. შედეგად 28 წლის თაზო გორთამაშვილი დაიღუპა, ერთი ადამიანი კი მძიმედ დაიჭრა. საქმეზე დაკავებულია მერაბ კობიაშვილი, რომელსაც ბრალი მკვლელობისა და მკვლელობის მცდელობისთვის წაუყენეს.
ნიუპოსტი
კომენტარები