პრობაციის სამსახური მუსიკოს მიხაილო თოდუას ციხეში დაბრუნებას მოითხოვს. როგორც მუსიკოსი აცხადებს, პრობაციის სამსახურს სურს, რომ საპატიმროში სასჯელის დარჩენილი ვადით, წელიწადითა და ათი თვით დაბრუნდეს. თბილისის საქალაქო სასამართლოში პროცესი 11 ნოემბერს, 14:00 საათზე გაიმართება.
მიხაილო თოდუას თქმით, მას საპატიოდ 13-14 და 17 ოქტომბრის ღონისძიებები არ ჩაუთვალეს — 17 ოქტომბერს მან გირჩის პარტიულ ღონისძიებაზე, ღამის ათი საათის შემდეგ დაუკრა.
მუსიკოსის განმარტებით, ორივე ღონისძიების შემთხვევაში მას პრემიერმინისტრის განკარგულების დარღვევას ედავებიან, რომლის თანახმადაც, საღამოს ათი საათის შემდეგ გასართობი ღონისძიებების მოწყობა იკრძალება. მიხაილო ამბობს, რომ ორივე ბრალდება აბსურდია.
“13-14-ის ღონისძიებაზე იძახიან, რომ ათი საათის შემდეგ აკრძალულია და მაგის შემდეგ არ არის სწორი და კანონიერიო, რაც თავის თავს ეწინააღმდეგება, რადგან პრემიერის განკარგულება 15-ში შევიდა ძალაში. 17-ის ღონისძიებაზეც იმავე მიზეზს ასახელებენ, როცა მიუთითებენ, რომ მე წარვადგინე ცნობა, რომელსაც მაძლევს გირჩი”, — აღნიშნა მუსიკოსმა.
მისივე თქმით, 17 ოქტომბრისღონისძიებაზე წასვლის წინ თბილისის პრობაციის ბიუროს უფროსს, პაატა უჯმაჯურიძეს აუხსნა, რომ ოფიციალურ საბუთს გირჩი აძლევდა, რაზეც უპასუხეს, რომ ეს კანონიერი იქნებოდა. მიხაილო ფიქრობს, რომ მის გასვლას საპატიოდ გირჩის ღონისძიების გამო არ თვლიან.
“ერთადერთი იმას ვდარდობ, რომ ნორმალურმა სასამართლომ როგორ უნდა მიიღოს საერთოდ ეს განსახილველად? რა ვიცი, ვის იმედად ვიყო, რომ სწორ გადაწყვეტილებას მიიღებს. ამიტომ მინდა მეგობრებს მოვუწოდო, ვისაც გული შესტკივა, ხვალ მოვიდეს ორ საათზე”, — ამბობს მიხაილო თოდუა.
მუსიკოსი მიხეილ თოდუა (მიხაილო) 2013 წლის სექტემბერში 12 გრამი MDMA-სთვის დააკავეს და 9-წლიანი პატიმრობა მიუსაჯეს. მას საპროცესო შეთანხმება შესთავაზეს, თუმცა, 20 ათასი ლარის არქონის გამო სასჯელს საპატიმროში იხდიდა. საბოლოოდ, თოდუამ საპატიმრო დაწესებულება 2019 წელს დატოვა, ხოლო დარჩენილი ვადა შინაპატიმრობით შეეცვალა.
შინაპატიმრობის პირობებში ის ვალდებულია, ატაროს ელექტროსამაჯური და საღამოს 9 საათის შემდეგ სახლიდან არ გავიდეს. ღონისძიებებზე დაკვრის შემთხვევაში კი პრობაციის სამსახურს უნდა მიმართოს.
on.ge
კომენტარები