„ალია“, ლევან ჯავახიშვილი
„ალიას“ ესაუბრება იურისტი, ვალერი გელბახიანი.
– ბატონო ვალერი, ირაკლი ღარიბაშვილმა ხობში განაცხადა, – რა მნიშვნელობა აქვს ოპოზიცის მოიგებს თუ არა ადგილობრივი არჩევნებში კონკრეტულ საკრებულოებს და მერებს, ქვეყანას მაინც ცენტრალური ხელისუფლება მართავს, ძალაუფლება ჩვენს ხელშია და ვერც კი გატოკდებიანო. ამ კაცმა არ იცის კანონი და კონსტიტუცია თუ, ბოდიში და და, ფეხებზე ჰკიდია?
– მე ასე მგონია, ეს ცოდნის დეფიციტია და სხვა არაფერი. კაცი უკვე მეორედ არის ქვეყნის პრემიერ–მინისტრი და არ იცის ქვეყნის კონსტიტუცია, კანონი „ადგილობრივი თვითმმართველობის შესახებ“ და არც ცენტრალური ხელისუფლების, მთავრობის საქმიანობის შესახებ კანონები არ იცის. არ იცის, რა უფლებამოსილება გააჩნია მთავრობას და რა ადგილობრივი თვითმმართველობის ორგანოებს. მეტი უბედურება რაღა უნდა გვჭირდეს ახლა, პრემიერმა ის რომ არ იცის, რისი უფლება აქვს და რისი არა? რადგან პრემიერ–მინისტრი ასეთ განცხადებას აკეთებს, დარმწმუნებულია, რომ ეს არის სწორი და კანონიდან გამომდინარე. კანონი რომ სცოდნოდა, ამ განცხადებას არ გააკეთებდა. მან არ იცის, რომ თვითმმართველობა არის დამოუკიდებელი და არანაირი სუბორდინაციული კავშირი ცენტრალურ ხელისუფლებასთან არ გააჩნია. ქვეყანას მართავენ ადამიანები, რომელთაც კანონები არ იციან. როგორ უნდა მართონ ისე, რომ კანონის მოთხოვნებს არ ემორჩილებოდნენ, ექვემდებარებოდნენ, შებოჭილნი არ იყვნენ კანონის ნებით. აი, ამიტომაც გვაქვს საქმე კარგად, რომ კანონი საერთოდ არ აინტერესებთ, არც იციან და ისე მართავენ ქვეყანას. პრემიერ–მინისტრი ასეთი უცოდინარი რომ გვყავს, წარმოიდგინეთ, ქვედა დონეზე რა ხდება და რა მასშტაბის მასობრივი უვიცობაა. ეს არის აბსოლუტუზმი, ძალაუფლება მაქვს და რასაც მინდა იმას გავაკეთებო. ეს ავტორიტარიზმსაც კი სცდება. ავტორიტარიზმი მაინც კანონმდებლობის ჩარჩოებში არსებობს. ირღვევა კანონი, მაგრამ იმას მაინც ცდილობენ ისე წარმოაჩინონ, თითქოს არ დაირღვა. აბსოლუტუზმი არაფერში არ არსებობს, აქ უკვე კანონების სრული იგნორირება ხდება. მე ვარ და ჩემი ნაბადიო.
– კოალიციური მთავრობა წარადგინა ოპოზიციამ და „ქართული ოცნების“ ლიდერები აცხადებენ, საკრებულოში უმრავლესობა ჩვენია, საკრებულო არ დაამტკიცებს მაგ მთავრობას, ნიკა მელიამ რომც მოიგოს თბილისის მერის არჩევნებიო. აქ რა ხდება, ამ განცხადების მიღმა?
– აქაც ხელისუფლების ლიდების სრულ უვიცობასთან გვაქვს საქმე. საკრებულო თუ არ დაამტკიცებს თბილისის ახალ მთავრობას, არჩეული მერი მოვალეობის შემსრულებლებად დანიშნავს ვიცე–მერებს, მოადგილეებს, საქალაქო სამსახურების უფროსებს და ყველას, ვისაც მოისურვებს. ძველ ბიუჯეტს, წლევანდელ ბიუჯეტს ავტომატურად გადმოიტანს მომავალი წლის ბიუჯეტში, ეს კანონით არის განსაზღვრული და ძველი ბიუჯეტით გააგძლებენ მუშაობას, თუ არც ბიუჯეტი დაუმტკიცა საკრებულომ. სულ ტყულად ზეიმობენ „ქოცები“, რომ საკრებულოს ხელთ აქვს ბერკეტები და დაბლოკავს ოპოზიციური მთავრობის მუშაობას. გაოცებული ვუსმენ, როდესაც ამგვარ კომენტრებს ვისმენ ხელისუფლების სხვა და სხვა შტოს წარმომადგენლების მხრიდან. ნუთუ, ამის ღირსია საქართველო, ისეთი ხელისუფლება ჰყავდეს და ამხელა უმრავლესობაში ერთმა კაცმა არ იცოდეს კანონი? ხომ შეიძლება, ასიდან ოთხმოცმა არ იცოდეს, მაგრამ ასიდან არც ერთმა არ იცის. სად მიიღეს ეს დიპლომები, სად მიიღეს ეს „განათლება“? აბსოლუტური უცოდინრობა სუფევს „ქართულ ოცნებაში“. საიდან მოიყვანეს ეს გაუნათლებელი ხალხი? წამლად ერთი კვალიფიციური იურისტი ვერ მოუძებნიათ.
კომენტარები