“ფოტოზე ჩვენს უკან ჩანს მანქანა-მაცივარი და წერენ საწყობში გადაიღო ფოტოო! – არადა, პროზექტურაში ვიყავი და ცხედრების მაცივარი იყო” – ირაკლი ოქრუაშვილი

თავდაცვის ყოფილი მინისტრი ირაკლი ოქრუაშვილი “ტვ პირველის” გადაცემაში “რეაქცია” პირდაპირი ჩართვისას უკრაინაში არსებულ მძიმე სიტუაციაზე საუბრობს.

“ერთია, როდესაც ფოტოებით ან ვიდეოებით, რომ უყურებ და მეორეა, როცა ამ ყველაფერს საკუთარი თვალებით,  ხედავ. მეუღლემ და საკუთარმა დამ რამდენჯერმე გამაფრთხილა, რომ სოციალურ ქსელში რაიმე სისასტიკის ამსახველი ვიდეო და ფოტო მასალა არ დამედო. ეს არც გამიკეთებია, თუმცა ბავშვებთან საუბრისას წამომცდა, თუ რამდენი დახოცილი ძაღლი და კატა ვნახე. ესეც არ უნდა მეთქვა, რადგან მათზე ამ ინფორმაციამაც ძალიან იმოქმედა.

როდესაც სოციალურ ქსელში კომენტარებს ვუყურებ, რომ სად არის მტკიცებულება, სად ჩანს რომ ბავშვები გააუპატიურეს, სად არის მტკიცებულებები, რომ რუსებმა დახოცეს, აი ასეთ რამეს რომ წერენ, იმაზე ვდარდობ თუ რამდენად დეგრადირდა ჩვენი საზოგადოება. ძალიან ძნელია ამ ადამიანებს აუხსნა, თუ რისი გავლა გვიწევს აქ.

ამას წინათ სანდრო ქართველიშვილს შევხვდი აქ. ნამდვილ ქართველ ვაჟკაცს, რომელიც აქ იბრძვის. მან ერთი ფეხი დაკარგა ბრძოლაში და ის მაინც იბრძვის. მასთან ერთად სურათი გადავიღე და სოციალურ ქსელში განვათავსე. ფოტოზე ჩვენს უკან ჩანს მაცივარი და ვიღაც კომენტარებში წერს, რომ რა არის საწყობში გადაიღო ფოტოო. არადა, პროზექტურაში ვიყავი და ცხედრების მაცივარი იყო,” – განაცხადა ირაკლი ოქრუაშვილმა.