“ფიზიკურად ვერ დავტოვებდი ლაზარეს…” – ქალი, რომელმაც პირველადი დახმარება აღმოუჩინა შადრევანიდან ამოყვანილ ბავშვს

ქალი, რომელმაც ვაკის პარკის შადრევანში დენის დარტყმის შედეგად დაშავებულ ბავშვს, ლაზარეს პირველადი დახმარება აღმოუჩინა,  მეგი ბანცაძეა. იგი დღეს “ნიუ ჰოსპიტალში” მივიდა დაშავებულის სანახავად.

მეგი მომხდარს იხსენებს:

“მე რომ მივედი დიდი ხმაური იყო, ბავშვები ტიროდნენ… ორივე – გოგონა და ბიჭი ამოყვანილები იყვნენ წყლიდან, ეწვინათ ორივენი. კლასელები იყვნენ იქ. საკმაოდ რთული სიტუაცია დამხვდა იმიტომ, რომ ორივე უმძიმეს მდგომარეობაში იყო. უშუალოდ ლაზარესთან აღმოვჩნდი ახლოს, გოგონა ჩემგან ცოტა შორს იყო და ლაზარეს გავუწიე პირველადი დახმარება, გულის მასაჟები გავუკეთე, ჩემთან ერთად კიდევ იყო ერთი მამაკაცი, რომელიც მეხმარებოდა. რომ მივიღე პულსი, უკვე სასწრაფოს მანქანაში ჩავსვი. ფიზიკურად ვერ დავტოვებდი ლაზარეს, ბავშვის მდგომარეობა არ მაძლევდა იმის საშუალებას, რომ გოგონასაც დავხმარებოდი. რადგანაც დავინახე, რომ სასწრაფო დახმარება გოგონას უკვე დახმარებას უწევდა, მე უფრო ლაზარეს მხარეს ვიყავი.”