გაეროს გენერალურმა მდივანმა, ანტონიო გუტერეშმა განაცხადა, რომ კორონავირუსი უფრო სწრაფად ვრცელდება, ვიდრე ვაქცინები, ხოლო პანდემია შორსაა დასრულებისგან.
ჯანდაცვის მსოფლიო ორგანიზაციის მონაცემებით, მსოფლიოში კორონავირუსით გარდაცვლილთა რიცხვმა 4 მილიონს გადააჭარბა.
„ვირუსის გავრცელება ვაქცინების განაწილებას უსწრებს. ეს პანდემიის დასასრული ჯერ კიდევ შორსაა. მსოფლიოს მასშტაბით კორონავირუსით გარდაცვლილთა ნახევარზე მეტი მიმდინარე წელზე მოდის“, – აღნიშნა გაეროს გენერალურმა მდივანმა.
ანტონიო გუტერეშის თქმით, თუ ვირუსს გავრცელების საშუალება ექნება, კიდევ მილიონობით ადამიანი საფრთხის ქვეშ აღმოჩნდება.
„რაც უფრო აქტიურად ვრცელდება ვირუსი, მით უფრო მეტი შტამი ჩნდება, რომელიც უფრო გადამდები, უფრო მომაკვდინებელი და ვაქცინების მიმართ უფრო მდგრადი იქნება“, – განაცხადა მან.
გაეროს გენერალური მდივანი კვლავ გამოვიდა მოწოდებით, შეიქმნას ვაქცინაციის გლობალური გეგმა, რათა ვაქცინების წარმოება, სულ მცირე, გაორმაგდეს და მათი სამართლიანი განაწილება უზრუნველყოფილი იყოს.
კომენტარები