პაატა მანჯგალაძე – „გორბის“ კვლევაზე: „დაჩის ზღაპრები“ ჰქვია ამას

„სტრატეგია აღმაშენებლის“ წევრი, პაატა მანჯგალაძე „გორბის“ კვლევას გამოეხმაურა.

„კვლევა ამბობს, რომ 55 პროცენტს, რა სიღარიბეშიც ცხოვრობს ქვეყანა, მოსწონს, მექსიკიდან ამერიკაში რომ მიდიან მისი ოჯახის წევრები, საჯარო სამსახურში რომ ხელფასები იზრდება და პენსია – არა, ეს მოსწონს, ყოველი მესამე ბავშვი რომ შიმშილობს სკოლაში, ეს მოსწონთ. მე არ მგონია, ასე ვფიქრობდეთ ქართველები. „დაჩის ზღაპრები“ ჰქვია ამას, კვლევა კი არა…

ჩვენს რეიტინგს რაც შეეხება, ბევრი კვლევაა, ხან 20 პროცენტია, ხან – 25. ძირითადი კვლევა არის არჩევნები და ჩვენ ვემზადებით არჩევნებისთვის. ხელისუფლებას ეშინია „ნაციონალური მოძრაობის“ და „სტრატეგია აღმაშენებლის“ ერთობის“, – განაცხადა მანჯგალაძემ.

ცნობისთვის, ტელეკომპანია „იმედის“ დაკვეთით, GORBI საზოგადოებრივი აზრის კვლევის შედეგებს აქვეყნებს, რომლის მიხედვითაც, დღეს რომ საპარლამენტო არჩევნები ტარდებოდეს, რესპონდენტთა 55% ხმას „ქართულ ოცნებას“ მისცემდა, მეორე ადგილზე კი 20%-ით „ნაცმოძრაობა“ და „სტრატეგია აღმაშენებელი“ გავიდოდნენ.