„ქართული ოცნების“ შემომწირველმა კომპანიამ ბოლო შვიდი წლის განმავლობაში ბიუჯეტიდან 160 მილიონი ლარი მიიღო – შესაბამის კვლევას “ფლანგვის დეტექტორი” ავრცელებს.
ორგანიზაციის წარმ ომადგენლები ამბობენ, რომ 2017 წელს თბილისის მერის არჩევნების პერიოდში შპს ჯეუ გრუპის მფლობელებმა მმართველ პარტიას 50,000 ლარი შესწირეს.
მას შემდეგ, რაც კახა კალაძემ არჩევნებში გაიმარჯვა, მერიამ კომპანიასთან 73,087,015 ლარის ხელშკრულებები გააფორმა.
მოგვიანებით, ჯეუ გრუპი მერმა კალაძემ კახეთის გზატკეცილის უხარისხო სარეაბილიტაციო სამუშაოს გამო საჯაროდ გააკრიტიკა, თუმცა 2019-ში ჯეუ გრუპმა უკონკურენტო ტენდერში გამარჯვებით მიიღო ჭავჭავაძის გამზირის რეაბილიტაციის 8-მილიონიანი შეკვეთა.
ჭავჭავაძის გამზირი 2020 წლის გაზაფხულზე უნდა დასრულებულიყო, თუმცა გზა ხელახლა გადათხარეს და ახლა ივლისის ბოლოს ამბობენ.
“შპს ჯეუ გრუპი დაარსდა 2008 წლის 23 აპრილს. კომპანიის 50-50%-ს ფლობენ გიორგი მარკოიშვილი და ნინო კიკაბაძე. აღნიშნული კომპანია ოპერირებს გზების მშენებლობისა და რეაბილიტაციის მიმართულებით.
2013 წლიდან ის აქტიურად მონაწილეობს ტენდერებში, რომლის შემსყიდველიც ყველა შემთხვევაში არის სხვადასხვა სახელმწიფო ორგანო. 2013 წლიდან 2020 წლის ჩათვლით სახელმწიფო ორგანოების მიერ ამ კომპანიასთან გაფორმებული ხელშეკრულებების ღირებულება შეადგენს 159,317,027 ლარს. აქედან 7,982,512 ლარი ამ კომპანიამ მიიღო გამარტივებული შესყიდვის გზით, რაც გულისხმობს რომ შემსყიდველმა სახელმწიფო ორგანოებმა ყოველგვარი ტენდერის და კონკურსის გარეშე უშუალოდ ამ კომპანიასთან გააფორმა ხელშეკრულება.
აღსანიშნავია ისიც, რომ ამ კომპანიის მფლობელები არიან მმართველი პარტიის მსხვილი შემომწირველები. 2017 წლის აგვისტოში, ადგილობრივი არჩევნების წინაპერიოდში შპს ჯეუ გრუპის მფლობელებმა 25-25 ათასი ლარი შესწირეს მმართველ პარტიას.
2017 წლის საარჩევნო კამპაანის დროს მმართველი პარტიისთვის შეწირული 50,000 ლარის შემდეგ ამ კომპანიასთან გაფორმებული ხელშეკრულებების ოდენობა მკვეთრად გაიზარდა. მხოლოდ თბილისის მერიამ, კახა კალაძის მერად არჩევის შემდეგ, 2017 წლის ბოლოდან – 2020 წლის ჩათვლით, ამ კომპანიასთან 73,087,015 ლარის ხელშეკრულება გააფორმა, აქედან 1,039,200 ლარის –– გამარტივებული შესყიდვის გზით.
აღსანიშნავია ისიც რომ 2019 წელს ეს კომპანია ასრულებდა კახეთის გზატკეცილზე გზის სარეაბილიტაციო სამუშაოებს, რასთან დაკავშირებითაც კახა კალაძემ შპს ჯეუ გრუპი გააკრიტიკა. მისი თქმით: “ის რაც კახეთის გზატკეცილის სათადარიგო გზებზე ხდებოდა, იყო სრული კატასტროფა”.
იგივე კომპანია ასრულებს სამუშაოებს თბილისში, ჭავჭავაძის გამზირზე. 2019 წლის 31 იანვარს თბილისის მერიის მიერ გამოცხადებულ ტენდერში, ჭავჭავაძის გამზირის სარეაბილიტაციო სამუშაოებისთვის, შპს ჯეუ გრუპმა უკონკურენტოდ გაიმარჯვა და 2019 წლის მარტში მასთან 7,820,989 ლარის ღირებულების ხელშეკრულება დაიდო. სამუშაოების პირველი ეტაპი 2019 წლის სექტემბერში უნდა დასრულებულიყო, ხოლო მთლიანად გამზირის რეაბილიტაცია გაზაფხულზე. თუმცა ხელშეკრულებაში ცვლილება შევიდა, სამუშაოების დასრულების ბოლო ვადამ გადაიწია.
ამავე დროს ხელახლა მოხდა ჭავჭავაძის გამზირზე დაგებული ასფალტის გადათხრა. როგორც მერიაში ამბობენ სანიაღვრე ჭების ხუფები უნდა დაამონტაჟონ, სანამ ასფალტის ბოლო ფენა გადაეგება გზის ამ მოკვეთს და აქამდე დაგებული ასფალტის აყრაც წინასწარ იყო დაგეგმილი. მერის მოადგილის ირაკლი ბენდელიანის განცხადებით, რომელიც შემოდგომაზე ამბობდა, რომ ჭავჭავაძის გამზირზე სამუშაოები გაზაფხულზე დასრულდებოდა, 2020 წლის 12 მაისს აცხადებს, რომ სამუშაოები სავარაუდოდ ივლისის ბოლომდე დასრულდება”- წერია განცხადებაში.
კომენტარები