“ოცნება” კმაყოფილია, “ენმ”-ი -ბედნიერი და ყველას ავიწყდება…” – ლევან ლორთქიფანიძე

პოლიტოლოგი, ლევან ლორთქიფანიძე:

“საქართველოში დოკუმენტის ხელმოწერა მხოლოდ კალამსა და ქაღალდს შორის ურთიერთსიყვარულის გამოვლინება ჰგონიათ. არადა, რომელიმე შეთანხმებაზე საკუთარი სახელისა და გვარის, საკუთარი ორგანიზაციის დასახელების აღბეჭდვა უპირველესად პასუხისმგებლობებისა და ვალდებულებების გაზიარებას ნიშნავს.

შარლ მიშელის დოკუმენტი არ ითვალისწინებს ანულირებისა და გაუქმების პროცედურებს. “ქართულმა ოცნებამ” 19 აპრილსვე იცოდა, რომ ენმ არ შეუერთდებოდა შეთანხმებას. მიუხედავად ენმ-ის საბოტაჟისა მმართველმა გუნდმა მაინც გადადგა ნაბიჯი და ხელი მოაწერა ევროპული საბჭოს პრეზიდენტის მიერ შემოთავაზებულ პუნქტებს. მაშასადამე, მიიღო გადაწყვეტილება, რომ სააკაშვილის, მელიასა და დეკანოიძის ინიციალების ფურცელზე გადმოტანის გარეშეც იმუშავებდა მართლმსაჯულების რეფორმაზე, იშრომებდა საარჩევნო კოდექსის განახლებისთვის და 43%-იანი ბარიერის დაძლევით დაამტკიცებდა თავის უპირობო უპირატესობას ჩვენს პოლიტიკურ ველზე (რითაც გააქარწყლებდა საპარლამენტო არჩევნების “მასობრივ ფალსიფიკაციასთან” დაკავშირებულ შფოთსა და ეჭვებს).

“ქართულმა ოცნებამ” უღალატა თავის სიტყვას, გამოხატა სრული უპატივცემულობა და აგდებული დამოკიდებულება საკუთარი პასუხისმგებლობებისა და დასავლელი პარტნიორების მიმართ, რომლებმაც თვეების განმავლობაში დღე და ღამე გაასწორეს სიტუაციის დასამშვიდებლად. ქოცებს სწორება აქვთ ნაცებზე და არა ხალხსა და მეგობრებზე… ქოცები უფრთხიან ბარიერს!

სამარცხვინოა, იმ აქტიური მოქალაქეების, ჟურნალისტების, ფეისბუკ-დისიდენტებისა და ექსპერტების პოზიცია, რომლებიც სიტყვას არ ძრავენ ენმ-ის დანაშაულებრივ როლზე შარლ მიშელის მონდომების წყალში ჩაყრის საქმეში.

ნაციონალებს სურთ, რომ სხვები წესებს ემორჩილებოდნენ და თავად უწესოდ იქცეოდნენ; სხვევს პასუხისმგებლობა ამძიმებდეთ და თავად პასუხისმგებლობების გარეშე თარეშობდნენ; სხვები ვალდებულებებით იყვნენ შებოჭილნი და თავად რაც უნდათ, ის აკეთონ! ორმაგი სტანდარტის დაშვება ერთი აქტორისთვის, იწვევს ორმაგი სტანდარტების გავრცელებას მთელს საზოგადოებაზე !!!

რა არის შედეგი შარლ მიშელის დოკუმენტის ანულირებისა?

1. “ქართული ოცნება” კმაყოფილია, რადგან მურუსიძე-ჩინჩალაძის საზარელ კლანს გზას გაუხსნის, საარჩევნო რეფორმას მიიტანს იქამდე, სადამდეც თავად აწყობს; მშვიდად იასპარეზებს არჩევნებზე და 43%-ს აღარ ექნება საბედისწერო მნიშვნელობა. თან ყველაფერს ენმ-ს დააბრალებს, მაგათ რომ მოეწერათ ხელი, ჩვენ მზად ვიყავით თავგანწირვისთვისო.

2. ენმ-ც ბედნიერია, შეუძლია უფრო მეტი რიხით ამტკიცოს, რომ უპასუხისმგებლო, დასავლეთთან კონფლიქტში ჩართული, საკუთარი სიტყვის მოღალატე მთავრობა გვყავს, რომელიც რუსეთისკენ მიგვაქანებს.

უბრალოდ, ყველას ავიწყდება, რომ თავმოყვარე ლიდერები თავიანთი მონდომების ფეხქვეშ გათელვას არავის პატიობენ.”