„ოცნება“ ბევრმა მოღალატემ დატოვა, რამაც საბოლოო ჯამში გაჯანსაღების პროცესს ხელი უნდა შეუწყოს“ – დავით ქართველიშვილი

2012 წლის 1 ოქტომბერს, “ბოცებში” გადმოღებულ იქნა ახლადდაწურული ყურძნის წვენი. ის ჯერ ღვინო ვერანაირად ვერ იქნებოდა. დროთა განმავლობაში – ოდნავ გაიფილტრა და სოლიდური პირველი ლექიც წარმოშვა: უსუფაშვილი, ხიდაშელი, სანიკიძე და ა.შ.

დადგა ამ ყურძნის წვენის ახალ “ბოცებში” მეორედ გადაღების დრო – რამაც მომავალი ღვინო კიდევ უფრო გაფილტრა, მაგრამ უნალექოდ არც ამ პროცესს ჩაუვლია: ბესელია, ფოფხაძე, გოგიჩაიშვილი და ა.შ.

მესამე გადაღების ჟამიც მიუახლოვდა “ღვთაებრივ სითხეს” – თითქმის დასუფთავდა, ფსკერზე “ქვა” დაიდო მხოლოდ: გახარია, გოგაშვილი და ა.შ. “ქვაზე” დგომა დიდი ხნით აღარ აცადეს უკვე ჩამოყალიბებულ ღვინოს და ის მეოთხედ გადაიღეს – უკვე დაწკრიალებული სითხის სახით.

დღეს მისი მირთმევა უკვე თამამად შეიძლება, მაგრამ, თუ ბოცებს საგულდაგულოდ მოუვლიან, შეინახავენ, რათა არ გაიბზაროს, არ დასკდეს, შიგ შეპარულმა ჰაერმა არ დააძმაროს – 2024 წელს ის განსაკუთრებულად კარგი დასალევი იქნება.

ეს არის ჩემი პასუხი – “ქართული ოცნების” კრიტიკოსთა მისამართით, რომლებისთვის ამ პარტიაში მიმდინარე პროცესები 2012-2014-2016-2018-2020-2022 წლებში განიხილება უცვლელ, სტატიკურ კონტექსტში: მაჭარიდან – ღვინომდე, ლექის ჯიუტად არ/შემჩნევის ფორმატში.

“ქართული ოცნება” – ცოცხალი ორგანიზმია, რომელმაც დინამიკური მეტამორფოზების სახით, ბუნებრივი კანონებით, თავის დღევანდელ, მიმზიდველ მდგომარეობას მიაღწია. არც ლექზე მოახდინა ღვინის გადაჭარბებით დატოვება, არც გადაღების პროცესი დაზარებია. და თუ დაღვინების ტექნოლოგიის დროს, რამე შეცდომა გამოეპარა – ვინც უშეცდომოა, პირველმა დაუშინოს ბოცებს ქვები. მაგრამ ამ შემთხვევაში – 2024-ში უღვინოდ დარჩენაზეც იფიქრეთ!“