“ოცნება” ადამიანებს ეუბნება, თუ არ გვაღიარებთ, ციხეში ჩაგსვამთო – ზურა ჯაფარიძე

“ოცნება” ადამიანებს ეუბნება, თუ არ გვაღიარებთ, ციხეში ჩაგსვამთო – ასე ეხმაურება კოალიცია “ცვლილებისთვის” ერთ-ერთი ლიდერი, ზურა ჯაფარიძე ირაკლი კობახიძის დღევანდელ განცხადებას, რომელმაც თქვა, რომ სურს, პარლამენტმა ხელისუფლების არაღიარების კრიმინალიზების კანონი რაც შეიძლება მალე მიიღოს.

ჯაფარიძის თქმით, “ოცნება” იმით, რომ საკუთარ მოქალაქეებს კანონის ძალით ავალებს აღიარებს, თავად აღიარებს, რომ მათ ლეგიტიმურობას არც ქვეყნის შიგნით და არც ქვეყნის გარეთ არ ცნობენ.

“ჰარვარდის დოქტორანტურის დამთავრება არ სჭირდება ნებისმიერი ადამიანისთვის იმის გააზრებას, რომ არ არსებობს სამყაროში იმაზე უფრო სერიოზული მტკიცებულება მათი არაღიარების და არალეგიტიმურობის, ვიდრე ის, რომ  საკუთარ მოქალაქეებს კანონის ძალით ავალებენ, რომ ისინი აღიარონ. იმ ადამიანებს, რომლებიც კონსტიტუციით მათი ძალაუფლებსი წყარო არიან, რომ თუ არ გვაღიარებთ, ციხეში ჩაგსვამთო. მე რამდენიც არ უნდა ვილაპარაკო, როგორ შეიძლება მაგაზე უფრო წონიანი მტკიცებულება დავდო, ვიდრე ის, რომ რომ მათ არ აღიარებენ არც ქვეყნის შიგნით და არც ქვეყნის გარეთ”, – ამბობს ზურა ჯაფარიძე.