პოლიტიკურ პარტიებს, რომლებიც აგზავნიან წერილებს ევროპულ სტრუქტურებში, მიკერძოებული პოლიტიკური ინტერესები აქვთ. ისინი ამ დღის წესრიგით მოქმედებენ მაშინ, როდესაც ჩვენ ვმოქმედებთ ჩვენი სახელმწიფოებრივი დღის წესრიგით, – ამის შესახებ „ქართული ოცნების“ თავმჯდომარე ირაკლი კობახიძემ 19 აპრილის შეთანხმებაზე ხელმომწერი ოპოზიციური პარტიების წარმომადგენლების წერილთან დაკავშირებით განაცხადა, რომლითაც შარლ მიშელს, ჟოზეფ ბორელსა და ოლივერ ვარჰეის მიმართავენ. კობახიძის თქმით, ოპოზიციის რადიკალური ნაწილი მისთვის წამგებიან პროცესში შევიდა, საიდანაც გამოსვლას ვეღარ ახერხებს.
ოპოზიციის რადიკალური ნაწილი ხედავს, რომ ყველა ბრძოლა წააგეს და შევიდნენ ისეთ პროცესში, რომელიც მათთვის არ იყო მომგებიანი, თუმცა ვეღარც გამოდიან ახლა ამ პროცესიდან. ეს არის მათი პრობლემა, შესაბამისად, ჩვენი მთავარი ამოცანაა, ვიმოქმედოთ არა მათი მათთვისვე გაუგებარი დღის წესრიგის მიხედვით, არამედ სახელმწიფოებრივი დღის წესრიგის შესაბამისად. ჩვენ უნდა ვაკეთოთ ის, რაც არის სახელმწიფოს და საზოგადოების ინტერესებში. რა თქმა უნდა, მათ კიდევ ერთხელ მოვუწოდებთ, რომ თავი დააღწიონ იმ არასწორ დღის წესრიგს, იმ სპირალს, რომელშიც თავადვე არიან შესული წინა საპარლამენტო არჩევნების შემდეგ. ისინი უნდა გადაერთონ პოზიტიურ, ქვეყნისთვის საინტერესო და სასარგებლო დღის წესრიგზე“, – განაცხადა ირაკლი კობახიძემ.
კომენტარები