ოპოზიცია არის რთულ, მძიმე, კატასტროფულ მდგომარეობაში – რაზე მიუთითებს აქციის 2 თვის შემდეგ დაანონსება? – პრემიერი

პრემიერმინისტრი, ირაკლი ღარიბაშვილი ამერიკის სენატში საქართველოში მიმდინარე პოლიტიკურ კრიზისზე გამართულ დებატებზე პირველ კომენტარს აკეთებს:

“მე მინდა პირველ რიგში მადლობა გადავუხადო აშშ-ს სენატს და სახელმწიფო დეპარტამენტს, კონკრეტულად ბატონ ჯორჯ კენტს, გაკეთებული შეფასებებისთვის, სამართლიანი შეფასებებისთვის და ობიექტურობისთვის, ეს ერთი. აღნიშნული მოსმენა და იქ გაკეთებული შეფასებები კიდევ ერთხელ ცხადყოფს, რომ საქართველო არის აშშ-სთვის ერთ-ერთი ყველაზე მნიშვნელოვანი პარტნიორი სახელმწიფო ჩვენს რეგიონში. 

ყოველგვარ სპეკულაციებს წერტილი დაესვა აღნიშნული განცხადებებით, და რაც მთავარია დასრულდა ის ერთგვარი აბსურდული ბრალდებები და ცილისწამებები, სპეკულაციები ნებსიმიერ თემაზე, რომელიც გვესმოდა ოპოზიციისგან.

მზად ვართ მოკლე დროში განვახორციელოთ საარჩევნო რეფორმა, მართლმსახჯულების რეფორმა, ყველა რეკომენდაცია გავითვალისწინოთ, რომელიც გაჟღერდა სენატის მხრიდან.

ოპოზიციას დარჩა 2 არჩევანი, მოუსმინონ და გაითვალისწინონ საერთაშორისო პარტნიორების მოწოდებები, შევიდნენ პარლამენტში და მეორე – თუ ისინი გააგრძელებენ დესტრუქციას და არ გაემიჯნებიან სააკაშვილს, მათ მოუწევთ მარგინალიზაციის გზით სიარული.

რაც შეეხება ოპოზიციის მიერ დაანონსებულ აქციის გამართვას 2 თვის შემდეგ, დამისახელეთ ქვეყანა, სადაც ოპოზიცია აანონსებს აქციას 2 თვის შემდეგ, მე არ ვიცი. რაზე მიუთითებს, რომ საკუთარი მხარდამჭერებიც აღარ დადიან, მათ მიერ დანაონსებულ აქციაზე. ოპოზიცია არის რთულ, მძიმე, კატასტროფულ მდგომარეობაში, ვგულისხმობ სააკაშვილის ფრთას. სხვა კომენტარს ვერ გავაკეთებ.”