ოკუპირებულ აფხაზეთში საქართველოსთან საომრად ემზადებიან – არძინბა

ოკუპირებულ აფხაზეთში აქტიური სამობილიზაციო მზადება მიმდინარეობს. ამის შესახებ ოკუპირებული რეგიონის „სახალხო მოძრაობის“ ლიდერმა ადგურ არძინბამ განაცხადა. ინფორმაციას „ეხო კავკაზა“ ავრცელებს.

მისი თქმით, კონფლიქტის დაწყება „ნებისმიერ წუთს არის შესაძლებელი. მისი განუახლებლობის მთავარი გარანტია კონფლიქტისთვის მზადებაა“.

„საქართველოში არსებობენ გარკვეული ძალები, რომლებსაც მიაჩნიათ, რომ საჭიროა უკრაინაში არსებული სიტუაციის გამოყენება და მეორე ფრონტის გახსნა. მათ მხარს უჭერენ დასავლეთის ქვეყნები. ყურადღებით ვაკვირდებით იმას, რაც საქართველოში ხდება“ – განაცხადა არძინბამ.

მისი თქმით, აქტიურად მიმდინარეობს სარეზევრო ბატალიონების წვრთნები.

არძინბა ამბობს, რომ ახალგაზრდები ბატალიონში „დიდი ენთუზიაზმით ეწერებიან“. მისი ინფორმაციით, მხოლოდ ახალ ათონში განახლებულ ბატალიონში 520 ადამიანი ჩაეწერა.

„ბატალიონში არსებობენ ადამიანები, რომლებსაც თანამედროვე ომის გამოცდილება აქვთ, მათ შორის უკრაინაში“ – ამბობს ადგურ არძინბა.

წყარო: pia.ge