ჩვენ აქ ვართ ერთიანები თავისუფლებაში. ჩვენ ვართ ერთიანები ჩვენს არჩევანში, მრავალფეროვნებაში, და არ გვინდა რომ ვიყოთ ერთნაირები. ვართ სხვადასხვანაირები, მაგრამ ვიკრიბებით რუსთაველის გამზირზე ერთი მიზეზით. ჩვენ ვართ ეროვნული ინტერესების დამცველები რუსთაველის გამზირზე და ყველას აქვს უფლება იდგეს იქ, სადაც დგას, – ამის შესახებ რუსთაველის გამზირზე მიმდინარე საპროტესტო აქციაზე „ნაციონალური მოძრაობის“ პოლიტსაბჭოს თავმჯდომარემ, ნიკა მელიამ განაცხადა.
„ჩვენ გვაქვს ერთი ხმა და ეს ხმა წაგვართვეს, მაგრამ ეს ხმა ლაპარაკობს რუსთაველის გამზირზე. ეს ხმა აპროტესტებს რუსთაველის გამზირზე. რამდენჯერაც არ უნდა დაგვშალონ, ისევ შევიკრიბებით, რამდენჯერაც არ უნდა სცადონ გაყალბება, ჩვენ არ გავყალბდებით. ჩვენ აქ ვართ ერთიანები თავისუფლებაში. ჩვენ ვართ ერთიანები ჩვენს არჩევანში, მრავალფეროვნებაში, და არ გვინდა რომ ვიყოთ ერთნაირები. ვართ სხვადასხვანაირები, მაგრამ ვიკრიბებით რუსთაველის გამზირზე ერთი მიზეზით. ჩვენ ვართ ეროვნული ინტერესების დამცველები რუსთაველის გამზირზე და ყველას აქვს უფლება იდგეს იქ, სადაც დგას. დიალოგში შესვლა არის სწორი ნაბიჯი, მაგრამ თქვენი დამსახურებაა, რომ არჩევნებიდან 12 დღეში ხელისუფლება ოპოზიციასთან ჯდება და ითხოვს მის მოსმენას. თამარ ჟვანია აუცილებლად უნდა მოხვდეს საპატიმროში. ახლა ხელისუფლება ცდილობს, დააჩქაროს პროცესი ცესკოში, სასამართლოში, ყველა ინსტიტუტში მისთვის სასარგებლო შედეგის გასაფორმებლად და პარალელურად გახსნას დიალოგი ხალხთან, ვისაც წარმოვადგენთ ჩვენ მოლაპარაკეკბებზე და ასე ეცადოს ამ პროცესის ჩაკვლას, მაგრამ ეს მათ არ გამოუვათ. ბავშვიც კი ხვდება, რომ მარტო ჟვანია და ცესკო კი არ აყალბებს, ჟვანიაც აყალბებდა, სუს-იც, პროკურატურაც და აღმასრულებელი ხელისუფლებაც. ეს არის რეჟიმი. ჩვენ აქ მხოლოდ ჩვენს არჩევანს კი არ ვიცავთ, ჩვენს მოპარულ ხმას კი არ ვიცავთ, აქ სახელმწიფოებრიობას ვიცავთ – სახელმწიფო არ იქნება იქ, სადაც არჩევნები არ ტარდება“, – განაცხადა მელიამ.
პარლამენტთან ოპოზიციის საპროტესტო აქცია მიმდინარეობს. ოპოზიციური პარტიები არჩევნებს გაყალბებულს უწოდებენ და ხელახალი არჩევნების ჩატარებას, ცესკოს თავმჯდომარის თამარ ჟვანიას გადადგომას, საარჩევნო ადმინისტრაციის ახალი წესით დაკომპლექტებასა და „პოლიტპატიმრების“ გათავისუფლებას ითხოვენ.
კომენტარები