“ყოველთვის, როდესაც ნაციონალური მოძრაობა მძიმე მდგომარეობაში ვარდება, ხან საკუთარ ოფისებს წვავენ, ხან საკუთარ პლაკატებს ებრძვიან”.- ასე ეხმაურება ქართული ოცნების თავმჯდომარე ირაკლი კობახიძე ენმ-ს ოფისზე შესაძელო თავდასხმას.
კობახიძე ამბობს, რომ მომხდართან დაკავშირებით “რაღაც” ინფორმაცია აქვს, თუმცა, “ყველაფერი შესაბამისმა უწყებებმა უნდა განაცხადონ”. კობახიძე დარწმუნებულია რომ გამოძიებას შედეგი ექნება.
ჟურნალისტის კითხვაზე, თავად ენმ-მა ესროლა თუ არა პლაკატს, კობახიძე პასუხობს რომ “რატომაც არა?”
“სხვა ლოგიკა სად არის? რომელ სულელს უნდა მოუვიდეს თავში, რომ ოპონენტმა ესროლოს ნაცმოძრაობის პლაკატს. სწორედ იმისთვის, რომ დღეს კითხვები ისმება იმასთან დაკავშირებით, რომ ნაცმოძრაობის პლაკატი “დაჭრეს” და ნაცმოძრაობას ებრძვის ქართული ოცნება? – სისულელეა”.- ამბობს კობახიძე.
17 მარტს, ერთიანი ნაციონალური მოძრაობის პრესსამსახურმა Facebook-ზე დაწერა, რომ ენმ-ის მთავარ ოფისს ესროლეს, გასროლის კვალი პარტიის თავმჯდომარის, ნიკა მელიას ბანერს ეტყობა. შსს-ს ცნობით, მომხდარ ფაქტზე შინაგან საქმეთა სამინისტრომ გამოძიება დაიწყო სსკ-ის 187-ე და 236-ე მუხლებით, რაც სხვისი ნივთის დაზიანებასა და ცეცხლსასროლი იარაღის მართლსაწინააღმდეგო შეძენა-შენახვა-ტარებას გულისხმობს.
კომენტარები