საქართველოს პარლამენტში, სადაც „მინისტრის საათის“ ფორმატში იუსტიციის მინისტრს, რატი ბრეგაძეს უსმენენ, „ნაციონალური მოძრაობის“ წევრებმა ტრაფარეტები გამოფინეს მიხეილ სააკაშვილის ფოტოებით.
ამის შემდეგ მათ პროტესტის ნიშნად დარბაზი დატოვეს. „ნაციონალური მოძრაობის“ წევრმა, ანა წითლიძემ დარბაზის დატოვებისას რატი ბრეგაძეს მიმართა, რომ მის ქმედებებზე მისი შვილები აგებენ პასუხს.
მანამდე პარლამენტში სიტყვით გამოვიდა „ნაციონალური მოძრაობის“ წევრი, ხატია დეკანოიძე, რომელმაც რატი ბრეგაძეს სისხლის სამართლის დამნაშავე უწოდა.
„წარმოდგენილი მინისტრი, რომელიც აქ მოვიდა, არის სისხლის სამართლის დამნაშავე და ახლა უნდა პასუხობდეს პროკურორის, გამოძიების კითხვებს, არათუ იდგეს აქ და საქართველოს საზოგადოებას, რეალურად, ნაცარს აყრიდეს. მას ჰყოფნის თავხედობა, მოვიდეს და, ჩემო კოლეგებო, თქვენც, ყველანი, დადგებით და მოუსმენთ ადამიანს, რომელიც არის სისხლის სამართლის პირდაპირი დამნაშავე. ადამიანი, რომელსაც პირდაპირ გამოცხადებული აქვს სიკვდილის ქრონიკა. ეს ადამიანი ახლა აქ არ უნდა იდგეს, უნდა იყოს პროკურატურაში, იჯდეს და პასუხობდეს კითხვებს, რომელიც აქვს საქართველოს საზოგადოებას. ამიტომ ჩაფიქრდით თითოეული თქვენგანი. დარწმუნებული ვარ, ბატონო რატი, თქვენ ძალიან მალე აუცილებლად წარსდგებით საქართველოს მართლმსაჯულების წინაშე, იქნებით გამოძიების უშუალო ობიექტი სისხლის სამართლის საქმეში „სააკაშვილი – რატი ბრეგაძე“. ეს არის ყველაზე მნიშვნელოვანი“, – განაცხადა დეკანოიძემ.
კომენტარები