„ნათია თურნავა „ნაცების“ დროს დასანახად ვერ იტანდა ივანიშვილსა და „ოცნებას“, მერე პატრონად ჩხარტიშვილი გამოუჩნდა და აპატიეს ყველაფერი“ – დავით ჭიჭინაძე

ლევან ჯავახიშვილი, „ალია“

„ალიას“ ესაუბრება პოლიტიკური მოძრაობა „სახალხო ტრიბუნის“ ლიდერი, დავით ჭიჭინაძე.

– ხალხმა ათეულობით მილიონი მოიპარა,  მართლა გამოხრეს ბიუჯეტი და დღემდე დაუსჯელები არიან, ზოგი ყოფილი თუ მოქმედეი მინისტრია, ზოგი დეპუტატი და ზოგი ხელისუფლების ფავორიტი ბიზნესმენი. ნათია თურნავა „ნაცმოძრაობის“ დროს ეკონომიკის მინისტრის პირველი მოადგილე იყო. სხვათა შორის, დასანახად ვერ იტანდა ბიძინა ივანიშვილს და „ქართულ ოცნებას“ და დღეს ამ ხელისუფლების მინისტრია, ვანო ჩხარტიშვილმა აჩუქა სასურველი თანამდებობა. ნათია თურნავა ყველაფერს ჰყიდდა და ყველაფერს ანიავებდა. ხელისუფლება რომ შეიცვალა, მის წინააღმდეგ სისხლის სამართლის საქმეც იყო აღძრული, დაკითხვაზეც იყო დაბარებული ფინანსურ პოლიციაში. შემდეგ ეს ყველაფერი ჩაიფარცხა, იმ პერიოდში გამოუჩნდა პატრონად ჩხარტიშვილი და დააწინაურეს, იმის ნაცვლად, ჩადენილზე პასუხი ეგო. დღეს ვხედავთ, რომ  ნათია თურნავა ირაკლი ღარიბაშვილისთვის მაინც და მაინც სასურველი პიროვნება არ არის. თურნავას ის ძველი კორუფცია შერჩა და ახლაც ირგებს ამ კორუფციას, ბევრისთვის ეს მაგალითია, ალბათ, სტიმულია. თავი შეუცვლელები ჰგონიათ, ინფორმაციებს გაჰყიდიან და ამ ინფორმაციების სანაცვლოდ თავს გადაირჩენენ. ჩვენთან ხომ ასე არიან. ყველა მინისტრი, ყველა მაღალი თანამდებობის პირი, მნიშვნელოვან კომპრომატებს აგროვებს  ერთმანეთზე, რომ ამ კომპრომატების  მეშვეობით დაცულები იყვნენ. დანაშაულს ყველა სჩადის და მერე ერთმანეთის თვალთვალით, ჩაწერით და ყარაულობით არიან დაკავებულები. ადრეც ასე იყო. ყიდდნენ კომპრომატებს და ამით თავის გადარჩენას ახერხებენ და ზოგიერთი პოლიტიკაშიც რჩებოდა. შევარდნაძის გუნდის წევრები „ნაცმოძრაობაში“ აღმოჩნდნენ, „ქართული ოცნება“ სავსეა „ნაცებით“. ერთი ხალხია ესენი და თავს ვიტყუებთ. პრინციპი და ქვეყნის ძარცვის მოდელი არ შეცვლილა არც ერთი ხელისუფლების პერიოდში.

– ზოგიერთი ექსპერტი და ოპოზიციონერი პოლიტიკოსი ამბობს, რომ ირაკლი ღარიბაშვილი და ირაკლი კობახიძე სამკვდრო–სასიცოცხლოდ არინ გადაკიდებულნი, ეკა ტიკარაძის „ქართული ოცნების“ პოლიტსაბჭოში დარჩენა ირაკლი კობახიძეს გააძლიერებს, ღარიბაშვილთან დაპირისპირებული ტიკარაძე ავტომატურად მის გუნდში აღმოჩნდებაო. რამდენად დამაჯერებელია ეს ვერსია?

– კარგით, რა. ტიკარაძემ ვინ უნდა გააძლიეროს? რა, გამოვა ახლა და ისეთი პოპულარული სპიკერი გახდება, ქვეყანას გადაატრიალებს? ადამიანს ხის ფეხი რომ გაუკეთო, შეემატება რაიმე და უკეთ ივლის? პირიქით, ხის ფეხი ხელს შეუშლის სიარულში. ქალმა რამდენიც პირი დააღო და რაღაც თქვა, იმდენჯერ ყველა გააღიზიანა და ყველა გადაიკიდა. მთელი ჯანდაცვის სფერო ტიკარაძემ დაანგრია და დაარბია თავისი ხისტი გადაწყვეტილებებით. ბოლოს, მე ვფიქრობ, უფუნქციოდ იყო და სადღაც ხომ უნდა წასულიყო. ესეც მითია. ვერასდროს ვერ ჩაჯდება ტიკარაძე კობახიძის გუნდში. ამბისტანიაობა, თუ ეს იგულისხმება, პოლიტსაბჭოდან ღარიბაშვილისა და მისი მომხრეების, ან სხვების საწინააღმდეგო ინფორმაციების მიტანა ივანიშვილამდე, ასეთები ივანიშვილს პარტიაში კი არა, ძალოვან სტრუქტურებში ჰყავს და პოლიტსაბჭოდან ბიძინა ივანიშვილს ერთი ირაკლი კობახიძეც ეყოფა, ეკა ტიკარაძე არ სჭირდება.