ყოფილი პარლამენტარი, ეკონომისტი რომან გოცირიძე პროკურატურის მიერ, დიდი ოდენობის ფულის გათეთრებაზე ერთი პირის დაკავებას ეხმაურება:
,,ნაჩქარევ დასკვნებს ნუ გამოვიტანთ პროკურატურის განცხადებიდან. კარგი ის არის, რომ ქვეყანაში შემოვიდა 624 მილიონი დოლარი და 35 მილიონი ევრო, ხოლო ცუდი ის არის, რომ ეს ხდებოდა უკანონოდ, ნაღდი, შავი ფულის სახით, მანქანის სამალავში განთავსებული.
მაკროეკონომიკური თვალსაზრისით ამ ფულის თუნდაც ერთი ნაწილის ეკონომიკაში ინვესტირება ზრდის მშპ-ს და ქმნის სამუშაო ადგილებს, ამყარებს ლარს და ზრდის ეროვნული ბანკის რეზერვებს.
მეორეს მხრივ, არალეგალურად შემოტანილი ფული( დიდი ალბათობით ეს არის რუსული რუბლები) რომელი ქვეყნის მოქალაქეების მიერ არის შემოტანილი, გაურკვეველია. რამდენად არის ეს ფული ქვეყნის უსაფრთხოების კუთხით ურისკო, შესაფასებელია.
როგორც ჩანს, თანხის ნაწილი ქვეყნიდანაც გავიდოდა( ალბათ რუსული რუბლით დოლარის შეძენის გზით). არც ესაა საგანგაშო. ეს ლარზე არ მოახდენს არავითარ გავლენას, რადგან რუსული რუბლი ჩვენთვის სასურველი უცხოური ვალუტაა, სამწუხაროდ, რუსეთიდან მზარდი იმპორტის გამო.
როგორც პროკურატურის განცხადებიდან ჩანს, საქმე ეხება 2022-2024 წლებს( რაც რუსეთის უკრაინაში შეჭრის პერიოდს ემთხვევა). ამ ფაქტების შესახებ ალბათ ცნობილი იყო ხელისუფლების მაღალ ეშელონებში, მფარველებიც ეყოლებოდათ რა თქმა უნდა, ამბავი კი თითქმის ერთი წლის შემდეგ გამოამზეურეს. ეს უკვე შიდაკლანური ბრძოლის კონტექსტში უნდა იქნას განხილული( ღარიბაშვილის მთავრობის მიმართ რეპრესიების დაწყების კუთხით).
მოკლედ, მრავალპლანიანი საკითხია და მეტი დეტალების გაგების შემდეგ ადვილი იქნება მთელი სურათის დანახვა. ერთი რამ ფაქტია-ასეულ მილიონობით დოლარი შემოვიდა, რაღაც ნაწილი აქ დარჩა. რას მოხმარდა, საკითხავი აი ეს არის.
შავი ფული, შავი იმპორტ-ექსპორტი, სანქციების გვერდის ავლა, ესაა ქართული ეკონომიკის რეალობა, რომელიც ასევე არის ეკონომიკური ზრდია ფაქტორი, ოღონდ ეს ნაზარდი ხალხამდე კი არ მიდის, არამედ მსგავსი სქემებით ხელისუფლებასთან დაკავშირებული პირებისა და ბიზნესის ჯიბეში ილექება.“
კომენტარები