„მზად ვარ, ხელფასი რომ ჩამერიცხება ნიკა მელიას გირაოსთვის გადავრიცხო“ – ალეკო ელისაშვილი

პარტია „მოქალაქეების“ ლიდერის ალეკო ელისაშვილის განცხადებით, მზად არის, რომ დეპუტატის ხელფასის ჩარიცხვის შემდეგ თანხა ნიკა მელიას გირაოსთვის გადარიცხოს. 

მისი თქმით, ოპოზიციური პარტიის ხელმძღვანელისთვის უფლებამოსილების შეწყვეტა არასწორია.

„ჩვენ რა თქმა უნდა ამას მხარს არ ვუჭერთ, რადგან არ არის სწორი ოპოზიციური პარტიის ხელმძღვანელისთვის უფლებამოსილების შეჩერება. ეთერით ნიკა მელიამ მომმართა და თქვა, რომ ერთხელ უკვე გადავიხადე გირაო და ამდენი თანხა ნამდვილად არ მაქვს, რომ მეორედ გადავიხადოო. გასაგებია, რომ ორჯერ გადასახდელად 30 000 არავის აქვს ზედმეტი, მათ შორის არც მე.

ნიკასადმი ჩემი ადამიანური დამოკიდებულების გამო, მე მზად ვარ, აქ რომ ხელფასი ჩამერიცხება, მისი გირაოსთვის გადავრიცხო, მართალია ეს 30 000 არ არის, მაგრამ მაინც“, – აღნიშნა ალეკო ელისაშვილმა.

როგორც მან განაცხადა, იმუნიტეტი სწორედ ოპოზიციონერი დეპუტატების დაცვას ითვალისწინებს და მისი მოხსნა ოპოზიციასთან ბრძოლას გულისხმობს.

შეგახსენებთ, რომ ნიკა მელიას დაკისრებული გირაოს თანხის, 70 000 ლარის, გადაუხდელობის გამო პატიმრობა ემუქრება.