დეკანოზი თეიმურაზ თათარაშვილი ადასტურებს, რომ კვირას, საქართველოში მსოფლიო პატრიარქს ელოდებიან.
სასულიერო პირის თქმით, კვირას, აღევლინება საგანგებო ლიტურგია, უწმინდესობას კი სწორედ ლიტურგიის შემდგომ დაკრძალავენ.
დეკანოზი თეიმურაზ თათარაშვილი აღნიშნავს, რომ საქართველოში ჩამოვლენ სხვა დელეგაციები სხვადასხვა ქვეყნებიდან. მათი სია კი მოგვიანებით გამოქვეყნდდება.
„ეს არის ჭეშმარიტად გულიდან წამოსული გლოვა და უდიდესი სევდა, რომელმაც მოიცვა თითქმის ყოველი ქრისტიანი. კათოლიკოს-პატრიარქ ილია მეორის, როგორც ერთ-ერთი მართლმადიდებელი ავტოკეფალიური ეკლესიის მწყემსის გარდაცვალება გახდა ძალიან დიდი წუხილი სხვადასხვა ავტოკეფალიური ეკლესიისთვისაც. ჩვენ მივიღეთ სამძიმრის წერილები თითქმის ყველა ავტოკეფალიური ეკლესიიდან და ვიცით, რომ მისი უწმინდესობის დაკრძალვის დღეს საქართველოში სტუმრად ჩამოვა სხვადასხვა დელეგაცია. თითქმის დადასტურდა ცნობა, რომ საქართველოში სტუმრად ჩამოვა მისი ყოვლად უწმინდესობა, მთავარეპისკოპოსი კონსტანტინოპოლისა, ბართლომეოსი, რომელიც მას, რა თქმა უნდა, წაუკითხავს მიცვალებულის მსახურებისთვის დაკავშირებულ ლოცვას და აღავლენენ ამ მართლმადიდებლურ მსახურებას. ამავდროულად, ჩამოვლენ სხვა დელეგაციები სხვადასხვა ქვეყნებიდან.
საყოველთაოდ ცნობილია, რომ ჩვენი ყურადღება, ჩვენი ორიენტირი სხვა რამეზე იყო გადატანილი, მახლობელ აღმოსავლეთში მიმდინარე პროცესებზე, რამაც ალბათ გამოიწვია შეზღუდვები ავიარეისებზე და ასე შემდეგ. ცოტათი რთულია დღეს გარკვეული ქვეყნიდან საქართველოში ჩამოსვლა და შეიძლება ამან გარკვეული დაბრკოლებები გამოიწვიოს, მაგრამ კონკრეტული სია რა თქმა უნდა, გამოქვეყნდება”, – განაცხადა მეუფემ.
სრულიად საქართველოს კათოლიკოს-პატრიარქის, უწმინდესისა და უნეტარესის ილია მეორის დაკრძალვას მსოფლიო პატრიარქი, ბართლომე დაესწრება.
ფაქტს საქართველოს საგარეო საქმეთა სამინისტროში ადასტურებენ.
კონსტანტინოპოლის პატრიარქი საქართველოს ბოლოს 13 წლის წინ სტუმრობდა.
კომენტარები