მოლდოვის პრეზიდენტმა მაია სანდუმ განაცხადა, რომ რუსული ზეწოლისგან ქვეყნის მყიფე დემოკრატიის დასაცავად, რეფერენდუმის ჩატარების შემთხვევაში, მეზობელ რუმინეთთან – ევროკავშირისა და ნატოს წევრ სახელმწიფოსთან – გაერთიანებას მხარს დაუჭერდა.
სანდუმ, რომლის პროევროპულმა მმართველმა პარტიამაც გასულ სექტემბერს მანდატი განაახლა, რუსეთი მოლდოვის შიდა საქმეებში ჩარევაში არაერთხელ დაადანაშაულა. მოლდოვა ყოფილი საბჭოთა რესპუბლიკაა, სადაც 2.4 მილიონი ადამიანი ცხოვრობს; მოსახლეობის უმრავლესობა რუმინულენოვანია, თუმცა ქვეყანაში რუსულენოვანი უმცირესობაც ცხოვრობს.
“რეფერენდუმის ჩატარების შემთხვევაში, ხმას რუმინეთთან გაერთიანებას მივცემდი. შეხედეთ, რა ხდება მსოფლიოში. მოლდოვის მსგავსი პატარა ქვეყნისთვის სულ უფრო რთულდება დემოკრატიულ და სუვერენულ სახელმწიფოდ გადარჩენა და, რა თქმა უნდა, რუსეთისთვის წინააღმდეგობის გაწევა”, – განაცხადა სანდუმ ბრიტანული პოდკასტისთვის მიცემულ ინტერვიუში.
რუმინეთის მოქალაქეობას დაახლოებით 1.5 მილიონი მოლდაველი ფლობს, თუმცა ბოლოდროინდელი გამოკითხვები აჩვენებს, რომ ბუქარესტთან ხელახალ გაერთიანებას მხარს მხოლოდ მოსახლეობის დაახლოებით მესამედი უჭერს.
სანდუმ აღნიშნა, რომ აცნობიერებს, მოლდაველთა უმრავლესობა მის პოზიციას არ იზიარებს და დასძინა, რომ ევროკავშირში ინტეგრაცია “უფრო რეალისტური მიზანია”.
სანდუს მთავრობის მიზანი 2030 წლისთვის ევროკავშირში გაწევრიანებაა, რისთვისაც რთული რეფორმების გატარება მოუწევს. განსაკუთრებით იმ ფონზე, რომ მოლდოვის პრორუსი სოციალისტები ხელისუფლებაში 2020 წლამდე იყვნენ.
მოლდოვა, რომელიც უკრაინასაც ესაზღვრება, ომებს შორის პერიოდში რუმინეთის შემადგენლობაში შედიოდა, თუმცა მეორე მსოფლიო ომის დროს საბჭოთა კავშირმა მისი ანექსია მოახდინა. ქვეყანამ დამოუკიდებლობა 1991 წელს, საბჭოთა კავშირის დაშლის შემდეგ მოიპოვა.
კომენტარები