პარტია “გირჩის” ლიდერის, ზურაბ ჯაფარიძის განცხადებით, დაპირისპირებულ თანაპარტიელებთან მოლაპარაკებების რესურსი აღარ არსებობს და მათი გზები საბოლოოდ გაიყარა.
ამასთან, როგორც ჯაფარიძე განმარტავს, სამართლიანი იქნება, რომ პარტიის სახელწოდება და ვებ-გვერდი დარჩეს მას.
„გამოვრიცხავ მოლაპარაკებებს და იმას, რომ ისევ ერთიანად გავაგრძელოთ. მაგის რესურსი აღარ არსებობს. პროცედურა რა იქნება, მაგას ვნახავთ. მაგას გადაწყვეტს ის ხალხი, ვინც არიან გირჩში“, – განაცხადა ზურაბ ჯაფარიძემ.
ცნობისთვის, დღეს, ზურაბ ჯაფარიძე “ლეიბორისტული პარტიის” ოფისში ოპოზიციის შეხვედრას არ დაესწრო.
შეგახსენებთ, თანაპარტიელებთან გამიჯვნის გადაწყვეტილების შესახებ ზურაბ ჯაფარიძემ გუშინ სოციალურ ქსელში დაწერა.
“ერთი მხრივ ჩემი, ხოლო მეორე მხრივ იაგოს, ვახოს და სანდროს გზები გაიყო. აღარ ვაპირებ მათთან ერთად „გირჩის“ კეთებას”, – წერს ჯაფარიძე.
მოგვიანებით კი, ზურაბ ჯაფარიძემ განაცხადა, რომ „გირჩი“ არ დაუტოვებია და პარტიის ლიდერად რჩება.
კომენტარები