მიუხედავად იმისა, რომ ოპოზიციურმა პარტიებმა სიის ჩახსნის თაობაზე ცესკო-ს მიმართეს, ოპოზიცია მზად არის მოლაპარაკებებისთვის, – ამის შესახებ „სტრატეგია აღმაშენებლის“ ერთ-ერთმა ლიდერმა, სერგო ჩიხლაძემ განაცხადა.
მისი თქმით, „წინა კვირაში, ხელისუფლების მხრიდან განცხადებების, მუქარისა და შანტაჟის შემდეგ, ვითარება შეიცვალა“. ამასთან, როგორც ჩიხლაძემ განაცხადა, მოლაპარაკებები ოპოზიციასა და ხელისუფლებას შორის სავარაუდოდ ხვალ ან ზეგ გაიმართება.
„წინა კვირაში შეიცვალა ვითარება ხელისუფლების მხრიდან განცხადებების, მუქარისა და შანტაჟის შემდეგ. ასევე იცით, რომ დაიწერა სიის ჩახსნაზე ოპოზიციური პარტიების თხოვნა ცენტრალური საარჩევნო კომისიიისადმი, ამის მიუხედავად, ოპოზიცია მზად ვართ, მოლაპარაკების გასაგრძელებლად. ვადითაც კი, ჯერჯერობით რჩება დრო მოსალაპარაკებლად, სანამ ხიდები საბოლოოდ ჩაიწვება. ძალიან დიდი იმედით ვუყურებთ ამ მოლაპარაკებას, რომელიც ხვალ ან ზეგ გაიმართება. ამის შემდეგ უფრო კონკრეტულად შეგვეძლება საუბარი პერსპექტივებზე“, – განაცხადა სერგო ჩიხლაძემ.
მისივე თქმით, ოპოზიციის მიერ წაყენებული მოთხოვნები უცვლელია.
„პირობები იგივეა და არ იცვლება. შესაბამისად, ის მოსალაპარაკებელი პუნქტები, რაც ჰქონდა ოპოზიციას და რაზეც არის საერთოდ მოლაპარაკება, უცვლელია. დანარჩენს გვანახებს „ქართული ოცნების“ შემხვედრი პოზიცია. ერთ-ერთი მთავარი მოთხოვნა პატიმრებთან ერთად, საარჩევნო კოდექსთან ერთად არის ისევ ვადამდელი ან ნაადრევი არჩევნების თემა. ეს რჩება მოლაპარაკების მაგიდაზე ოპოზიციის მხრიდან“, – განაცხადა ჩიხლაძემ.
„სტრატეგია აღმაშენებლის“ ერთ-ერთი ლიდერის თქმით, დაახლოებით შემდეგ კვირაში პარლამენტის თავმჯდომარის სახელზე განცხადებები დაიწერება.
„იქაც თავისი პროცედურებია და არის რაღაც 14-დღიანი ვადა“, – განაცხადა ჩიხლაძემ.
კითხვაზე, არსებობს თუ არა იმის ალბათობა, რომ ამ პერიოდში მანდატებზე არ თქვას უარი „სტრატეგია აღმაშენებელმა“, ჩიხლაძემ განაცხადა:
„ალბათობა არსებობს, თუ მოხდება შეთანხმება ამ პოლიტიკურ საკითხებზე, საუბარია მთლიანად ოპოზიციასა და ხელისუფლებას შორის. თუ არ მოხდება შეთანხმება, მაშინ ეს ალბათობაც არ იქნება. ალბათობა რომ არსებობს ამ ეტაპზე, იმიტომ არის მოლაპარაკებაც“, – განაცხადა სერგო ჩიხლაძემ.
კომენტარები