“მოხდა ტექნიკური შეცდომა” – რამდენი ლარით დაეხმარებიან მოქალაქეებს სინამდვილეში?

პრემიერ-მინისტრმა, გიორგი გახარიამ საგანგებო ბრიფინგზე განაცხადა:

„150-ლარიანი დახმარება საკმარისი არაა, ამიტომ ეს თანხა გაიზრდება. 150 ლარი საარსებო მინიმუმზე ნაკლებია. შეუძლებელია უბრალოდ, ვისაუბროთ სამსახურდაკარგული ადამიანების დახმარებაზე და არ გავითვალისწინოთ საარსებო მინიმუმი.

გარდა ამისა, სოციალური დახმარების ნაწილობრივი პაკეტი მთავრობამ უკვე წარადგინა – კომუნალური ხარჯების ნაწილში უკვე ვეხმარებით მოსახლეობას და ეს ძალიან დიდი მოცულობის კომპონენტია.

ყველას უნდა გვესმოდეს, რომ ამ კრიზისში ყოფნა ერთი წელი ან წელიწადნახევარი მოგვიწევს. ეს გამოწვევა ყოველთვის უნდა გვახსოვდეს.

ჩვენ შეიძლება ეკონომიკა გავხსნათ და კომპანიებს მუშაობის საშუალება მივცეთ, მაგრამ 65 წელს გადაცილებული მოქალაქეები შეიძლება კარანტინში კიდევ თვეების განმავლობაში დარჩნენ.

ჩვენთვის ათვლის ფორმალური წერტილია საგანგებო მდგომარეობის გამოცხადება, დაახლოებით მაინც უნდა ვიცოდეთ, რამდენ ხანს გასტანს ეს პერიოდი. ასევე სანამ მოლაპარაკებებს არ დავასრულებდით დონორებთან და ამ მოლაპარაკებამ სამ კვირაზე მეტხანს გასტანა, ვერ გვეცოდინებოდა, რა თანხის მობილიზებას შევძლებდით. როდესაც საგანგებო მდგომარეობის გახანგრძლივებაზე ვისაუბრებთ პარლამენტში, ამ გეგმასაც გაგაცნობთ.

პრემიერს ჟურნალისტებმა ჰკითხეს, როგორ დასახელდა 150 ლარი, თუ ჯერ არ იყო თანხა დათვლილი:

“ჩვენ ამ გეგმაზე ვმუშაობთ უკვე რამდენიმე თვეა, ეს იყო პირველად დასახელებული თანხა, მოხდა ტექნიკური შეცდომა და არ იქნა თანხა შეცვლილი”.

ჟურნალისტების კითხვას, რამდენი ლარით შეიცვლება 150 ლარი და რომ არ მომხდარიყო ტექნიკური შეცდომა, რა თანხას დაგვისახელებდნენ – პრემიერმა არ უპასუხა და ჯერჯერობით საიდუმლოდ დატოვა.

“ალია” – იმის გათვალისწინებით, რომ ეს “ტექნიკური შეცდომა” მედიასთან არაერთმა მინისტრმა გაიმეორა და დაასახელა 150 ლარი – ორი რამ უნდა ვივარაუდოთ – ან სპეციალურად დასახელდა 150 ლარი, ხალხის რეაქციის გასაანალიზებლად და საჭიროების შემთხვევაში შესაცვლელად – ან ჩვენი მინისტრები, ტექნიკურ შეცდომებს, გადაცდომებს და არასწორ ციფრებს ისე იმეორებენ, ყურადღებასაც არ აქცევენ.