მინისტრთა კაბინეტის შემადგენლობას ფრაქცია „ქართული ოცნების“ ფორმატში უსმენენ

საკომიტეტო მოსმენების შემდეგ მინისტრობის კანდიდატებს ფრაქცია „ქართული ოცნების“ ფორმატში უსმენენ.

როგორც პარლამენტის ვიცე სპიკერმა დავით სერგეენკომ განაცხადა, საკომიტეტო მოსმენების დროს ცალკეული მინისტრების სამოქმედო გეგმები მოისმინეს. მისივე თქმით, სხდომებზე კრიტიკული კითხვები იყო დასმული.

„ბოლო ორი დღის განმავლობაში საკომიტეტო მოსმენები გვქონდა, როცა ცალკეული მინისტრების სამოქმედო გეგმებს ვისმენდით. ვერ ვიტყვი, რომ ეს იყო რაღაცა დითირამბების მიძღვნა, იყო დასმული კრიტიკული კითხვები და ეს არ იყო პროტოკოლური, იყო რეალური ინტერესი. არ ვფიქრობ, რომ ეს მოსმენა კომენტარების გარეშე იქნება და ერთხმად მიღებული“, – განაცხადა სერგეენკომ.

შეგახსენებთ, საქართველოს პრემიერ-მინისტრობის კანდიდატმა, გიორგი გახარიამ, საქართველოს კონსტიტუციისა და პარლამენტის რეგლამენტის შესაბამისად, მეათე მოწვევის პარლამენტს მინისტრთა კაბინეტის შემადგენლობა და სამთავრობო პროგრამა – „ევროპული სახელმწიფოს მშენებლობისთვის” 18 დეკემბერს წარუდგინა.