პატრიოტთა ალიანსის ლიდერი, ირმა ინაშვილი:
მილიონერები თქვენ ხართ, ძალაუფლება თქვენ გაქვთ, ბიუჯეტი საკუთარ მუთაქად თქვენ გაქვთ გადაქცეული, ქვეყანაში მოსახლეობის 0,7%-ზე ანუ თქვენზე, თქვენს ახლობლებზე მოდის ყველანაირი სიმდიდრე, შემოსავალი- თვეში 100 000 ლარიდან 3 მილიონ ლარამდე! ანუ დაახლოებით 24 000 კაცი კისერზე აზის ქვეყანას და დანარჩენი 99%-ზე მეტი ფიზიკური გადარჩენისთვის იბრძვის. ამ ფონზე, ამ ტრაგიკულ და ფეოდალურ ფონზე 100 ბავშვის სიცოცხლის გადარჩენა ლამის გადაუჭრელ პრობლემად აქციეთ. გრცხვენოდეთ! ამერიკის შეერთებულ შტატებში, ევროპაში, თურმე, არ უფრთხილდებიან ბავშვების სიცოცხლეს და რიგ წამლებს, თქვენი მრუდე ლოგიკით, უდიერად გამოიყენებენ. ამას გვეუბნებით?! გგონიათ, ისე დააბნელეთ ქვეყანა, რომ ანალიზის უნარი აღარავის შერჩა?! ცდებით! სწორედ ამერიკასა და ევროპაში დიუშენის სინდრომით დაავადებული ბავშვების მკურნალობის შედეგები პოზიტიური და დადებითია! და აი, საქართველოს ჯანდაცვის მინისტრი გვიმტკიცებს, რომ სახიფათოა მედიკამენტები ბავშვებისთვის და არ შეიძენენ. სახიფათო კი არაა, ამ 100 ბავშვისთვის რამდენიმე მილიონი ლარის გამოყოფაზე ვერ ჩამოყალიბდით.
გამოსავალი რაშია? ისევ ვამბობ: უსაფრთხო, ეფექტური მედიკამენტები შეარჩიეთ, რეაბილიტაციის სრულფასოვანი კურსი შეუდგინეთ ბავშვებს, შექმენით მედიკოსთა მულტიდისციპლინური ჯგუფი, ამუშავდით, მუქარის და შეუვალობის რეჟიმიდან გამოდით და სრულიად ახალი მიდგომები გაგვიზიარეთ… ბიუჯეტიდან მილიონებს წვეულებებზე ხარჯავთ და 100 ბავშვის სიცოცხლის გახანგრძლივება რომ ნომერ პირველი საზრუნავია, თქვენს მაძღარ გონებაში ეს აზრი ნუთუ ასე უიმედოდაა ჩამქრალი?!
კომენტარები