„მიხეილ სააკაშვილი ნამდვილად იღებდა ისეთ მედიკამენტს, რომელიც არ უნდა მიეღო“ – ნევროლოგი

„მიხეილ სააკაშვილი ნამდვილად იღებდა ისეთ მედიკამენტს, რომელიც მას არ უნდა მიეღო,“- ამის შესახებ ექიმმა ნევროლოგმა ოთარ თოიძემ ჟურნალისტებს მესამე პრეზიდენტზე საუბრისას განუცხადა. 

„ბატონი მიხეილი 3 დღის წინ ვნახე და დინამიკის შესაფასებლად ვარ მოსული, რადგან ნევროლოგიურ სტატუსში გარკვეული ცვლილებები იყო. საკმაო ვადაა გასული იმისათვის, რომ სიმპტომატიკა შემსუბუქდეს. 

ფაქტზე მოგახსენებთ, რომ იგი ნამდვილად იღებდა ისეთ მედიკამენტს, რომელიც მას არ უნდა მიეღო თავისი ავადმყოფობიდან გამომდინარე. ვფიქრობთ, რომ ამ მედიკამენტმა დაამძიმა მისი ზოგადი, ფსიქოლოგიური მდგომარეობა და ასევე ნევროლოგიური სტატუსი“, – აცხადებს ექიმი.

ჟურნალისტის კითხვაზე თუ ვინ დაუნიშნა ფსიქოტროპული მედიკამენტი მესამე პრეზიდენტს, ნევროლოგი აცხადებს, რომ მედიკამენტი პენიტენციურ დაწესებულებაში დაუნიშნეს. 

„შემდგომ მოხდა დოზის რამდენიმეჯერ ცვლილება, პირველი ვიზიტისას, რომელიც ჩვენ განვახორციელეთ 27 ნოემბერს გადავწყვიტეთ, რომ ეს მედიკამენტი მისთვის იყო ზედმეტი და დამაზიანებელი“, – აცხადებს ექიმი.