,, მიხარია, რომ პატარა პოსტის წყალობით გმირის სახელი ჩემი კედლის გავლითაც გაცდება მდინარე სულორის სანაპიროებს” – ლევან ლორთქიფანიძე

,,კავკასიის სახლის” წევრი, ლევან ლორთქიფანიძე:

,,რამდენიმე დღეა იმერეთში ვარ – სოფელში, სადაც ბაბუაჩემი, მისი მამა და მისი ბაბუა დაიბადნენ…

ვანის რაიონის სოფელ სალხინოში ქუჩებს სახელები არ აქვთ. მაგალითად, ჩვენი ქოხი 25-ე ქუჩაზე მდებარეობს.

თუ არ ვცდები, არის ერთადერთი გამონაკლისი… სოფლის სკოლის გვერდით განლაგებულ აღმართს კაპრალ შალვა ტრაპაიძის სახელი ჰქვია.

30 წლის ჯარისკაცი 2008 წელს, ცხინვალის ალყის დროს დაიღუპა. სიცოცხლის ბოლო წუთებში ერთადერთი რამ აწუხებდა: “სიკვდილის არ მეშინია, უბრალოდ, არ მინდა თვენახევრის წინ მოყვანილი ცოლი გავამწარო”.

ნეტავ ისეთი სახელმწიფოს აშენება შევძლოთ, როგორსაც სალხინოელი ბიჭის თავგანწირვა იმსახურებს.

მიხარია, რომ პატარა პოსტის წყალობით გმირის სახელი ჩემი კედლის გავლითაც გაცდება მდინარე სულორის სანაპიროებს და კეთილი ადამიანები კაპრალის გვარს ამოიკითხავენ საქართველოს სხვა კუთხეებშიც და ერთ-ორ ევროპულ ქალაქშიც.

დღეს თუ არა ხვალ მაინც რუსეთი პასუხს აგებს იმპერიალისტურ ომებზე.”