„მგონი, პრეზიდენტს ახალი წლის ღონისძიებებზე მისაწვევსაც აღარ გაუგზავნიან“ – სალომე ზურაბიშვილი

“როგორი ლამაზი სიტყვებითაც არ უნდა ისაუბროს დღეს ვინმემ ჩვენი ხელისუფლებიდან, ფაქტი ფაქტად რჩება, რომ 2018 წლის შემდეგ ოკუპაციის პირობებში მცხოვრები ქვეყანა ეროვნული უსაფრთხოების კონცეფციის გარეშე მუშაობს, რაც კატასტროფაა, რადგან ყველას კარგად აჩვენებს, რამდენად არასახელმწიფოებრივი, არასისტემური, არაინსტიტუციურია საკუთარი ქვეყნის მიმართ დამოკიდებულება. ეროვნული უსაფრთხოების კონცეფცია ლამაზი სიტყვების კრებული და რაღაც დოკუმენტის სახელი კი არ არის, არამედ ფუნდამენტური ტექსტია, ქვეყნის კონსტიტუციის შემდეგ, რომლის შესაბამისადაც უნდა გაიმართოს, როგორც ჯარი, ასევე მთლიანად ქვეყნის თავდაცვისა და უსაფრთხოების სისტემა. რომელშიც უნდა იყოს გაცემული პასუხი მთავარ კითხვებზე: დაწყებული, რა საფრთხეების წინაშეა ქვეყანა, გაგრძელებული იმით, როგორ უნდა ვუპასუხოთ საფრთხეებს და დასრულებული იმით, რა რესურსები გამოვყოთ ან მოვიძიოთ იმისთვის, რომ საფრთხეებზე ჩვენი პასუხი იყოს ადეკვატური“, – აცხადებს  თავდაცვის ყოფილი მინისტრი თინა ხიდაშელი „პალიტრანიუსის“ გადაცემაში „360 გრადუსი“

ხიდაშელი „უცნაურს“ უწოდებს იმ ფაქტს, რომ ეროვნული უსაფრთხოების საბჭოს სხდომას საქართველოს პრეზიდენტი და პარლამენტის თავმჯდომარე არ ესწრებოდნენ.

ამასთან ხიდაშელი განმარტავს, რომ პრეზიდენტის დასწრებას სხდომაზე კანონი არ ითვალისწინებს, თუმცა არსებობს საკითხები, რაც „დაუწერელი კანონია“:

„არავის აქვს საბჭოს სხდომაზე პრეზიდენტის დაპატიჟების ვალდებულება. არსებობს ამბები, რაც თავისთავად იგულისხმება. მაგალითად, არსად გვიწერია კონსტიტუციაში, უცხო ქვეყნის პრეზიდენტი რომ ჩამოდის, შენი ქვეყნის პრეზიდენტი არათუ საქმის კურსში უნდა გყავდეს, არამედ ფორმალური, ხელის ჩამორთმევის დონეზე შეხვედრა მაინც აუცილებლად უნდა გაიმართოს, რადგან პრეზიდენტის ვიზიტია და შესაბამისი ინსტიტუცია თუ არსებობს ქვეყანაში, მაშინ სწორედ ის უნდა იყოს ერთ-ერთი მასპინძელი მხარე. არც ეს გვიწერია კონსტიტუციაში, მაგრამ არ მგონია, რომ დედამიწაზე ვინმეს ეპარებოდეს ეჭვი იმაში, რომ ეს აბსოლუტური აუცილებლობაა და დიპლომატიის ერთგვარი დაუწერელი კანონია“, – განაცხადა ხიდაშელმა და დასძინა: „მგონი, ახალი წლის ღონისძიებებზე მისაწვევსაც აღარ გაუგზავნიან“.

ხიდაშელის თქმით, საქართველოს პრეზიდენტს „ძალიან ბევრი ბერკეტი აქვს, რითაც საკუთარ თავს აბსოლუტურ აუცილებლობას გახდის ქვეყანაში“ და მათ შორის აღმასრულებელი ხელისუფლებისთვისაც „გახდის გასაგებს, რომ მას სხვანაირად უნდა ელაპარაკონ“.

„მაგალითად, მე ნიკა გვარამიას გავუშვებდი ციხიდან. ნიკა გვარამია იმიტომ უნდა გაუშვას ციხიდან, რომ ის აბსოლუტურად უკანონო პატიმარია, პოლიტპატიმარია, ანგარიშსწორების გამო არის დღეს ციხეში, ის ზის ციხეში ამბისთვის, რომელსაც სისხლის სამართლის კოდექსში დანაშაულიც კი არ ჰქვია“, – აცხადებს ხიდაშელი.