“მეუბნებიან, რომ მე აქ არ ვცხოვრობ” – აფხაზეთიდან დევნილი მოქალაქე დახმარებას ითხოვს

აფხაზეთიდან დევნილი ოჯახი დახმარებას ითხოვს. ნინო გოგუა მეუღლესთან და ორ მცირეწლოვან შვილთან ერთად 10 წელია ქუთაისში დევნილების და სოციალურად დაუცველების კორპუსში ცხოვრობს. ოჯახი რამდენიმე წელია საცხოვრებელი ფართის მიღებას უშედეგოდ  ელოდება. ნინო გოგუა “ტვ პირველთან” ამბობს,  ის ყველა კრიტერიუმს აკმაყოფილებს იმისთვის, რომ სახელმწიფომ საცხოვრებლით უზრუნველყოს, თუმცა დევნილთა სამინისტრო გაუგებარი მიზეზით უარს ეუბნება.

გოგუას თქმით,  იმ დროს, როცა დევნილების სია შედგა, ის ოჯახთან ერთად კოვიდსასტუმროში იმყოფებოდა, რის გამოც  დახმარების მიმღებთა შორის ვერ მოხვდა. მოგვიანებით კი მას საცხოვრებლის უზრუნველყოფაზე უარი უთხრეს. ამის შემდეგ მის კორპუსში მცხოვრები ყველა პირი ბინით დააკმაყოფილეს და კორპუსი ანულირებულად გამოაცხადეს. 

ორჯერ როცა სია დაიდო ორივეჯერ სიაში მოვხვდით, როცა იყო კომისია დანიშნული პირველივე დღესვე მივედით და გვეუბნებიან, რომ თქვენ არ ხართ სიაში. მიზეზს მეუბნებიან, რომ ჩვენ კოვიდსასტუმროში ვიყავით მაშინ გადაყვანილი და არ მოვხვდით სიაში და რადგან იმ წელს არ მოვხვდით, წელს გვეუბნებიან, რომ კორპუსი უკვე ანულირებულია და თქვენ აქ არ ცხოვრობთ“, – ამბობს ნინო გოგუა. 

ნინო გოგუა კომისიისგან წერილობით პასუხს ელოდება, რის შემდეგაც გეგმავს, რომ დევნილთა სამინისტროს წინააღმდეგ  სასამართლოს მიმართოს.