გერმანიის ახალი კანცლერი ფრიდრიხ მერცი, საფრანგეთის პრეზიდენტი ემანუელ მაკრონი, დიდი ბრიტანეთის პრემიერ-მინისტრი კირ სტარმერი და პოლონეთის პრემიერ-მინისტრი დონალდ ტუსკი შაბათს, 10 მაისს, კიევში ჩავიდნენ.
კიევის რკინიგზის სადგურზე ევროპელ ლიდერებს პრეზიდენტის ადმინისტრაციის ხელმძღვანელი ანდრეი ერმაკი და საგარეო საქმეთა მინისტრი ანდრეი სიბიჰა დახვდნენ.
“დღეს დატვირთული დღე იქნება. უაღრესად მნიშვნელოვანი შეხვედრები გველის. უკრაინაში ოთხ ევროპელ ლიდერს, „მდგრადთა კოალიციის“ ლიდერებს ვუმასპინძლებთ. ამიტომ, მნიშვნელოვან გადაწყვეტილებებს ველით, ევროპული სოლიდარობისა და უკრაინის მხარდაჭერის შემდგომ განმტკიცებას ველით”, – განაცხადა სიბიჰამ სადგურში.
ერმაკის თქმით, დღეს “ბევრი სამუშაო და განსახილველი თემა” იქნება.
“ჩვენ ეს ომი სამართლიანი მშვიდობით უნდა დავასრულოთ. ჩვენ უნდა ვაიძულოთ მოსკოვი, დათანხმდეს ცეცხლის შეწყვეტას,”- აღნიშნა პრეზიდენტის ადმინისტრაციის ხელმძღვანელმა.
“მტკიცე ნების კოალიციის” უკრაინაში შეკრების შესახებ განცხადება ვოლოდიმირ ზელენსკიმ გააკეთა, მისი თქმით, უკრაინას და მის პარტნიორებს სერიოზული სამუშაო აქვთ წინ. უკრაინის სახელმწიფოს მეთაურმა არ გაამხილა დეტალები იმის შესახებ, თუ რა საკითხების განხილვა იგეგმებოდა შეხვედრაზე.
დიდი ბრიტანეთი და საფრანგეთი უკრაინაში მშვიდობის დამყარების მცდელობებს ხელმძღვანელობენ. შეიქმნა “მტკიცე ნების კოალიცია”, რომელიც აერთიანებს ქვეყნებს, რომლებიც მზად არიან ჯარებით ან სხვა დახმარება გაეწიათ უკრაინაში მშვიდობის შესანარჩუნებლად.
ეს კოალიცია გამოირჩევა სწრაფი გადაწყვეტილებებით, თანამედროვე იარაღის მიწოდების, უკრაინელი სამხედრო პერსონალის მომზადებისა და ინფრასტრუქტურის აღდგენაში დახმარების მზაობით.
კომენტარები