მერიას მივმართავ, გაუუქმეთ ლიცენზია! – რას წერს ამირან სალუქვაძე?

სამხედრო ექსპერტი, ამირან სალუქვაძე, სოციალურ ქსელში, წერს:

“ტაქსებზე უნდა ვთქვა, რასაც იმსახურებენ. პირადად იშვიათად მიწევს სარგებლობა, მაგრამ უამრავი ადამიანისგან ვიგებ, თუ როგორ მოუმატეს ფასები პანდემიის და, განსაკუთრებით ახლა, საზოგადოებრივი ტრანსპორტის გაჩერების დროს.

საშუალოდ, მარშრუტი თუ ღირდა 8-10 ლარი, ახლი ითხოვენ 14-15-ს, რომელ მარშრუტზეც ადრე ითხოვდნენ 12-14-ს, ახლა ადის 20-მდე. ღამის საათებში საერთოდ თავგასულობაა.

ჩინური სოლიდარობის შესახებ ამ პანდემიის დროს ადრე ბევრჯერ დავწერე. ჩვენ შორს ვართ ასეთი შეგნებისგან და კულტურისგან.

კომპანია მაქსიმმა ოპერატორები სახლში დასვა, უხელფასოდ. ეს ცალკე თემაა. რესტორნებს ცალკე მოვიკითხავ, მიმტანები რომ დაიკიდეს ფეხებზე. გატანაზე ვინც მუშაობს, შეეძლოთ თავიანთი თანამშრომლების მხარდაჭერა.

მერიას მივმართავ. უნდა შეისწავლოთ საკითხი. მარშრუტებზე ტრანსპორტის გაჩერებამდე არსებული ტარიფები მოიკვლიეთ, არაა რთული. გამოაცხადეთ, ვინც ამ ტარიფებს გადააჭარბებს, სანამ საზოგადოებრივი ტრანსპორტი არ მუშაობს, მგზავრის მიერ დადასტურებული ჩივილის შემთხვევაში, გაუუქმეთ ლიცენზია.

ისე, ამ თემაზე საუბარი არ უნდა გვჭირდებოდეს. გამართლებას, ბენზინი გაძვირდა, ცხოვრება გაჭირდა და სხვა, ვერ მივიღებ! როცა მეტროს და ავტობუსების გაჩერებით სარგებლობ და ფასებს ზრდი, იმ პირობებში, როცა ერთადერთი სახეობის ტრანსპორტი დარჩა, ამორალურია.”

მოგვიანებით, ამირან სალუქვაძემ, სოციალური ქსელიდან წაშალა ეს წერილი.

“მაქსიმი” კი, ამირან სალუქვაძეს ასე პასუხობს:

ბატონო ამირან, სანამ ვინმეს ცილს დასწამებთ და ცრუ ინფორმაციას გაავრცელებთ, დაფიქრდით შედეგზე, ვიმედოვნებთ, რომ განზრახ არ გაგიკეთებიათ!

პოსტის გამოქვეყნებამდე, რომელსაც შეცდომაში შეჰყავს მოსახლეობა, არ იქნებოდა ურიგო გაგერკვიათ, ჰყავს თუ არა ოპერატორები სერვის „მაქსიმს“. მით უმეტეს, არიან თუ არა ოპერატორები უხელფასო შვებულებაში. ამის შემდეგ დაგეწერათ თქვენი პოზიცია.

ასევე კარგი იქნებოდა თავად შეგესწავლათ, რომელი კატეგორიის ტაქსებმა გააძვირეს მომსახურება.

რაც შეეხება სერვის „მაქსიმის“ ტარიფებს, მარტივად შეგეძლოთ აპლიკაციით ან/და გამოძახების ნომერზე დარეკვით გაგერკვიათ მგზავრობის ტარიფები, რითაც დარწმუნდებოდით, რომ „მაქსიმს“ ყველაზე ხელმისაწვდომი ფასები აქვს.

ჩვენ ვითვალისიწნებთ იმ ფაქტს, რომ საზოგადოებრივი ტრანსპორტის შეზღუდვის პირობებში მოსახლეობას ტაქსით უწევს ყველგან გადაადგილება და ამ გამოწვევას ლოიალური ტარიფების შენარჩუნებით ვპასუხობთ! კარგი იქნება აღიაროთ, რომ თქვენს პოსტში მითითებული ინფორმაცია, რომელიც ეხება სერვის “მაქსიმს”, არის მცდარი, ვინაიდან სერვისმა პანდემიის დაწყებიდან დღემდე შეინარჩუნა მთელი სტაფი, სრულად და დროულად უხდის დასაქმებულებს ხელფასს, იხდის გადასახადებს და მაქსიმალურად იცავს კანონმდებლობით დადგენილ ყველა რეგულაციას.