“მემუქრებიან, ასეთი მუქარა მოისმინა ჩვენმა ელჩმა” – რით დაემუქრა “ოცნება” პოლონეთის სეიმის ვიცე–სპიკერს?

პოლონეთის სეიმის ვიცე-სპიკერის, მალგოჟატა გოშევსკას განცხადებით, ემუქრებიან, რომ თუ ისევ გააგრძელებს სააკაშვილზე და საქართველზე საუბარს, საქართველოში შემოსვლის საშუალება აღარ ექნება. გოშევსკამ „ფორმულასთან“ თქვა:

„ასეთი საფრთხე, ასეთი მუქარა მოისმინა ჩვენმა ელჩმა, რომელსაც პირდაპირ განუცხადეს ეს. მე მაგალითად, არ მაქვს რუსეთში და ბელარუსში შესვლის საშუალება ჩემი საქმიანობიდან გამომდინარე და თუ ამ ქვეყნებს დაემატება საქართველო, აქ ყველაფერი ნათელი იქნება… ასეთი მუქარა იყო ფორმალურ საუბარში, რომელიც ჩაატარეს პოლონეთის რესპუბლიკის ელჩთან, ბატონ მაშკიევიჩთან. ოფიციალურ საუბარში გაისმა ეს მუქარა. მე იმედი მაქვს, აქამდე არ მივა საქმე. მინდა, საქართველო დაბრუნდეს ნორმალურ წრეზე და გვქონდეს საშუალება, რომ მოვინახულოთ პოლიტიკური პატიმრები. მე წლების განმავლობაში ვნახულობდი ციხეში ყოფილ პრემიერს, ბატონ ვანო მერაბიშვილს. მაშინ მქონდა ამის საშუალება, ახლა არ მაქვს ამის საშუალება და რამდენჯერმე სააკაშვილის ნახვაზე უარი მითხრეს, ასევე უარი მითხრეს გვარამიას მონახულებაზე“