„მელამ თავისი კუდი მოწმედ მოიყვანა” – გია ვოლსკი

მელიას განცხადებაზე მე ვიტყოდი, რომ ზუსტად შეეფერება ანდაზა – „მელამ თავისი კუდი მოწმედ მოიყვანა”, – ასე ეხმაურება “ქართული ოცნების” წევრი გია ვოლსკი ნიკა მელიას განცხადებას, რომ „ქართული ოცნება” სალომე ზურაბიშვილს არ ენდობა და მოლოდინი აქვთ, რომ შესაძლოა, მან სააკაშვილი შეიწყალოს.ვოლსკის თქმით, საქართველოს უნდა ჰყავდეს პრეზიდენტი, რომელსაც აქვს თავის მოსაზრებები და კონსტიტუციური უფლებები.

„რას ჰქვია ენდობა – არენდობა. ზურაბიშვილს “ქართულმა ოცნებამ” იმიტომ დაუჭირა მხარი, რომ თავის მოსაზრებები გააჩნია გარკვეულ საკითხებზე და დამოუკიდებელი პიროვნებაა, თუნდაც ხისტი. ტაშ-ფანდური იყო ატეხილი, რომ ის ხასიათს გამოავლენს მომავალში და ა.შ. გამოავლენს, არ დაემთხვევა ჩვენი მოსაზრებები და ვიტყვით ამასთან დაკავშირებით, რა პრობლემაა. პრეზიდენტი უნდა ჰყავდეს საქართველოს, რომელსაც აქვს თავის მოსაზრებები და კონსტიტუციური უფლებები.

ამის წინაპირობა არ არსებობს, ზურაბიშვილი დამოუკიდებელი პოლიტიკური ფიგურაა, თუმცა, ერთ რამეს ვიტყვი, როცა საერთაშორისო სტანდარტი რეაგირებას აკეთებს გარკვეულ ქმედებაზე, ეხება ეს საქართველოს პრეზიდენტს, ისრაელის ან უნგრეთის პრემიერ- მინისტრს, არის ბევრი ეგეთი ფაქტები, ამ შემთხვევაში აბსოლუტურად უსაფუძვლოა იმის ფიქრი, რომ ამ საერთაშორისო სტანდარტს ხაზი გადაუსვა და ისეთი რამ გააკეთო, რაც შენს მთელს მომავალ ცხოვრებას ამ ასპექტით განიხილავს. მე არც ვუშვებ ამას, რომ რომელიმე პრეზიდენტი ასეთ გადაწყვეტილებას მიიღებს“, – განაცხადა ვოლსკიმ.