“მაცადეთ! შალვა როგორ ატარებს ხოლმე ასე? ძალიან დავიძაბეთ!” – ამის შესახებ პარლამენტის ვიცე-სპიკერმა გიორგი ვოლსკიმ ბიუროს სხდომაზე განაცხადა, რომელსაც დღეს ის ხელმძღვანელობს, რადგან პაპუაშვილი საზღვარგარეთ იმყოფება.
კამათი რუსულ კანონს მოჰყვა, რადგან ოპოზიცია ცდილობს პასუხების მიღებას “ოცნების” დეპუტატებისგან.
უნდა დავასრულოთ ახლა ამ თემაზე მსჯელობა, აღარ შეიძლება! ჩემს მიმართაც რაღაც შეკითხვები იყო და პასუხს გავცემ კიდევ, მაცადეთ! შალვა როგორ ატარებს ხოლმე ასე… ძალიან დავიძაბეთ! – თქვა ვოლსკიმ.
დეპუტატ თეონა აქუბარდიას შეფასებით, „ქართულმა ოცნებამ“ სიტყვა გატეხა კანონის ხელმეორედ შემოტრიალებით.
მთავრობის განკარგულებების გამჭვირვალობით და მოსამართლეთა დეკლარაციების შემოწმებით დაიწყეთ. ირაკლი ღარიბაშვილის განკარგულებებით დაიწყეთ, გასაჯაროება რომ გეშინიათ – ალტერნატიულ კანონზე ვიმსჯელოთ, იმ გზით, რა გზითაც მიდის საფრანგეთი, რა გზითაც წავიდა ამერიკა, დიდი ბრიტანეთი. ტოლობის ნიშანი არ დავსვათ მტერსა და მეგობარს შორის, რასაც თქვენ აკეთებთ,” – მიმართა აქუბარდიამ.
პარტია „ლელოს“ ერთ-ერთი ლიდერის ანა ნაცვლიშვილის განცხადებით, რუსული კანონის რეგისტრაციაში გატარება ბიუროს მიერ საქართველოს ინტერესების საწინააღმდეგო მოქმედება და ღალატია. მას სიტყვიერად საპარლამენტო უმრავლესობის წევრი ეკა სეფაშვილი დაუპირისპირდა და ანა ნაცვლიშვილი ბიუროს სხდომაზე ტყუილისა და დეზინფორმაციის გავრცელებაში დაადანაშაულა.
ტყუილებს ავრცელებენ, ტყუილს საუბრობენ, დეზინფორმაციას რატომ ავრცელებთ?“ – ამ სიტყვებით მიმართა სეფაშვილმა ანა ნაცვლიშვილს.
ნაცვლიშვილის თქმით, დეზინფორმაციას ვინც ავრცელებდა, სწორედ ის გააჩუმა სოციალურმა ქსელმა „ფეისბუქმა“.
მე მინდა დავაფიქსირო პოზიცია „ქართული ოცნების“ მიერ ინიცირებულ კანონპროექტთან დაკავშირებით, რომელიც ერთხელ უკვე ჩავარდა ამ პარლამენტში. განმარტებითი ბარათი მაქვს ხელთ, მე მიმაჩნია, რომ ამ კანონპროექტის რეგისტრაციაში გატარებაც კი საქართველოს პარლამენტში არის საქართველოს ინტერესების საწინააღმდეგო მოქმედება. ამ განმარტებით ბარათში წერია ტყუილები- მე რამდენიმე ტყუილს წავიკითხავ. აქ წერია, რომ ეს კანონპროექტი არ ეწინააღმდეგება, თურმე, ევროკავშირის სამართალს და არ ეწინააღმდეგება, თურმე, საქართველოს საერთაშორისო ორგანიზაციებში წევრობასთან დაკავშირებულ ვალდებულებებს. ეს არის დეზინფორმაცია! მე ხელთ მაქვს ადამიანის უფლებათა ევროპული სასამართლოს გადაწყვეტილება ზუსტად ასეთ კანონთან დაკავშირებით, რომელიც იყო მიღებული რუსეთში, რომელთან დაკავშირებითაც ადამიანის უფლებათა ევროპულმა სასამართლომ მიიღო ვერდიქტი და თქვა, რომ ეს კანონი არის ევროპული ღირებულებების საწინააღმდეგო და ეს არის რუსული. ასევე, მაქვს ხელთ ლუქსემბურგის სასამართლოს გადაწყვეტილება, რომელმაც ზუსტად ასეთი, ორბანის კანონი გააუქმა. აქ წერია ტყუილი, ეს არ არის კანონი, რომელიც საქართველოს ინტერესებს შეესაბამება. ბიურომაც კი რომ დაარეგისტრიროს ეს კანონი ტყუილებზე დაფუძნებით არის ქვეყნის კონსტიტუციის და ევროპული მომავლის ღალატი. დეზინფორმაციით დაკავებულები ხართ თქვენ და ამიტომ გაგაჩუმათ „ფეისბუქმა“, ზუსტად ევროპულ კონვენციაზე დაყრდნობით, დაგაწერათ ტყუილი! ანტიევროპული რუსული კანონი ამ ქვეყანაში არ უნდა დარეგისტრირდეს!“ – განაცხადა ნაცვლიშვილმა.
„ტვპირველი“
კომენტარები