უკრაინის პრემიერ-მინისტრმა დენის შმიგალმა BBC News Ukraine-თან ინტერვიუში ისაუბრა უკრაინის აღდგენის გეგმაზე:
“უკრაინის აღდგენის გეგმა სამი ეტაპისგან შედგება, რომელთაგან პირველი, დანგრეული ობიექტების ოპერატიული აღდგენა, უკვე დაწყებულია.
ჩვენ უკვე გამოვაცხადეთ ეს გეგმა. დავარქვით მას U-24. ეს არის უკრაინის განახლების გეგმა. იქნება შესაბამისი აღდგენის ფონდი, რომელიც სამ ეტაპად განხორციელდება“, – განაცხადა მთავრობის მეთაურმა.
შმიგალის თქმით, პირველი ეტაპი განადგურებული ობიექტების ოპერატიული დროებითი აღდგენაა. მეორე ეტაპი არის სწრაფი განახლება საომარი მოქმედებების დასრულებისთანავე. როგორც პრემიერმა თქვა, უპირველეს ყოვლისა, საჭირო იქნება წყლისა და ელექტროენერგიის მიწოდების აღდგენა, რათა ხალხმა იარსებოს განადგურებულ ტერიტორიებზე. მესამე ეტაპზე კი „ჩვენი ქალაქების, დაბების, შენობების, ინფრასტრუქტურის და მთლიანად ქვეყნის სრულფასოვანი განახლებაა“.
პრემიერის თქმით, „ეს ეტაპი იქნება ყველაზე ძვირად ღირებული, ყველაზე ხანგრძლივი, მაგრამ ჩვენ გვინდა მისი განხორციელება ძალიან სწრაფად“. მან ასევე აღნიშნა, რომ ქვეყნის აღდგენა უნდა გაგრძელდეს უკრაინის ევროკავშირში გაწევრიანების პოლიტიკური პროცესების პარალელურად.
კომენტარები