მარტა ქურასბედიანმა და ქეთი ხიდიშელმა ტელეკომპანია „ფორმულა“ დატოვეს

ჟურნალისტებმა მარტა ქურასბედიანმა და ქეთი ხიდიშელმა ტელეკომპანია „ფორმულა“ დატოვეს, – აღნიშნული ინფორმაციას Pia.ge ავრცელებს

მარტა ქურასბედიანმა და ქეთი ხიდიშელმა განაცხადეს, რომ ტელეკომპანიის დატოვება სარედაქციო პოლიტიკას არ უკავშირდება და აღნიშნული გადაწყვეტილების მიღება გაფიცული თანამშრომლების მიმართ დამოკიდებულება გახდა.

„დეტალებზე საუბრისგან ჯერჯერობით თავს შევიკავებ, თუმცა გიდასტურებთ, რომ დავტოვე, დავტოვე გაფიცვის დაწყებიდან პირველივე დღეს, 1-ელ თებერვალს და მიზეზი გახდა დამოკიდებულება გაფიცული თანამშრომლების მიმართ. ჩემს გადაწყვეტილებას სარედაქციო პოლიტიკასთან არანაირი კავშირი არ აქვს“, – განაცხადა ქეთი ხიდიშელმა.

ქურასბედიანის თქმით, სამართლიანი პროტესტის წინააღმდეგ ხელმძღვანელობამ ცილისმწამებლურ კამპანიას მიმართა, რაც მისთვის მიუღებელი აღმოჩნდა.

„მე და ქეთიმ დავტოვეთ არხი, ამას ვადასტურებ, საკუთარი განცხადების საფუძველზე. ეს იყო არხის ვიდეო ოპერატორების გაფიცვის პირველ დღეს. მიზეზი გახდა ხელმძღვანელების დამოკიდებულება გაფიცული თანამშრომლების მიმართ. სამართლიანი პროტესტის წინააღმდეგ ხელმძღვანელობამ ცილისმწამებლურ კამპანიას მიმართა, რაც ჩემთვის იყო მიუღებელი და ამიტომ დავტოვე არხი. არხის დატოვებას კავშირი არ აქვს სარედაქციო პოლიტიკასთან. მეტ დეტალზე საუბარი ამ მომენტში არ მსურს“, – აღნიშნა მარტა ქურასბედიანმა.

ცნობისთვის, ტელეკომპანია „ფორმულამ“ საინფორმაციო სამსახურის 25-მდე ოპერატორი გაათავისუფლა.

.