მარნეულის „ავერსის“ კლინიკაში კოვიდინფიცირებული, 92 წლის ეთერ აბდუშელიშვილი გამოჯანმრთელდა, შვილიშვილის ანა კაპანაძის თქმით, ბებოს ცხელება რამდენიმე დღე ჰქონდა და შემდეგ დასუსტდა, ამიტომ მისი კლინიკაში გადაყვანა გახდა საჭირო.
„ბებო ჭიათურაში ცხოვრობს და ზამთრობით ჩვენთან არის, თბილისში. რამდენიმე დღე დილა საღამოს ჰქონდა ცხელება, მერე სხვა ოჯახის წევრებსაც დაგვიფიქსირდა ტემპერატურა, მე და მამა წავედით და ტესტი გავიკეთეთ, კოვიდი დაგვიდასტურდა, ამიტომ ვიფიქრეთ რომ ბებოსაც კოვიდი ჰქონდა, ცხელებასთან ერთად კიდეც ახველებდა, შემდეგ სასწრაფო გამოვიძახეთ. ექიმმა გვითხრა, რომ ბებო კლინიკაში იყო გადასაყვანი, მაგრამ თბილისში ადგილი ვერ ვნახეთ. მეორე დღესაც გადავამოწმეთ კლინიკები, თუმცა არც მაშინ გამოჩნდა ადგილი, შემდეგ გავიგეთ, რომ მარნეულის ავერსის კლინიკაში იყო შესაძლებელი ბებოს გადაყვანა და გადავიყვანეთ, ფილტვების ანთება ჰქონდა.
ერთი კვირა მკურნალობდნენ „ავერსში“, ძალიან კმაყოფილია ბებო კლინიკის ექიმებით, ამბობს, რომ დიდ ყურადღებას აქცევდნენ. დღეს გამოწერეს და ჩვენს ოჯახში ორმაგი სიხარულია, გამოწერეს ბებოც და ჩვენს ოჯახს ერთი წევრი შეემატა, ბებოს შვილთაშვილი შეეძინა“, – ამბობს ანა კაპანაძე.
კომენტარები